Hadii uu jiro Dal ay Soomaali ixtiraam ku leedahay waa Turkey.

3491

Qoraalkeeygaan yar ee aan ku cabirayo dareen ka dhashay fal celinno aan la kulmay mudo todobaad ah oo aan ku sugnaa Istanbul iyo dareen aan ka wariyey Saaxiibadeeyda halkaan ku nool ayaa ah dareen mudan in aan u soo bandhigo Dadka aan ka beermay ee Soomaaliyeed.

Sida aad la wada socotaan sanadkan dhammaadka ah bilowgiisa waxaa dalkaan soo maray dhacdooyin xanuun badan oo ay dad badani ku dhinteen ayadoo taasi laga gaashaamanayo ayaa waxaa jira sanadkan howlgallo ammaanka aad loogu xaqiijinayo oo magaalooyinka waaweyn ee Istanbul ay ugu horeyso ka jira.

Dhacdadii ugu horeysay waxa aan la kulmay habeen kadib markii aan halkaan imid oo goob uu baaritaan ka socday aan kasoo dul dhacnay aniga iyo saaxiibo ila socday wadada ayaa xirneyd qof walba waa la istaajinayey baaritaan iyo su’aallo weeydiin ayaa jiray waxaa saf ku jiray dad dalkaan u dhashay iyo ajaaniib qaarado kala duwan kasoo jeeday markii lanagu yimid oo aan is sheegnay inaan Soomaali nahay nalama weeydiin wax kale oo waxaa jawaab nalooga dhigay “Raali noqda dareema xoriyad oo horey u sii socda” ayadoo dadkii kale ay weli saf ku jiraan ayaan dhaqaaqnay.

Habeen ka hor anaga oo fadhina maqaayad ay dadku ku kulmaan ahna koox tira badan oo aan ka xusi karo Muha Ali , Abwaan Maki xaaji Banaadir iyo Hassan Baffo ayaa waxaa soo galay ciidammada sida gaarka ah u tababaran waxey ku amreen qof walba in uu fadhigiisa ku nagaado dibaddana usoo saaro sharciga uu dalkan ku joogo ama aqoonsigiisa .

Waxaan soo wada saarnay Dal ku galkeenna (Passports) ma jirin cid gaar bartilmaameed nooga dhigatay marka laga reebo sxbkeey Eng Fuad Mohiddin Khalif oo iga yara midab furan (cad) oo lagu yiri keen aqoonsigaaga marka uu Passport kiisa soo bixiyey ee Astaanta Qaranka Soomaaliya lagu arkay uu askarigii la hadlayey ku yiri “iga raali noqo hadii aad Soomaali tahay,Soomaalidiina kalena raali ahaada oo xoriyad dareema” intii kale ee carabta,afrikaanka iyo turkida aheedna su’aallo iyo baaritaan oogadooda ah lagula dhaqaaqay.

Waxaan durba soo xasuustay ixtiraamka dalkan Soomaali u yaala iyo sida dalalka qaarkood Soomaalideena loogala dhaqmo oo meelaha qaar ee ay dadku ku badan yihiin marka ciidan yimaado bartilmaameedka koobaad aan u nahay xitaa hadii aan sharci ku joogno dalalkaas.

Saaxiibadeeyda kale ee dalkan horey ugu noolaa oo uu ka mid yahay wariye Salman Jamal Said waxa ay ii sheegeen in ka sokoow dhacdooyinka aan goobjooga u ahay mar walba Dadkeenna sidaan looga tixgeliyo Turkiga.

Walaalaha Turkiga Alle haka abaal mariyo ixtitaamka ay dadkeenna u hayaan ,dadka aan ka dhashay ee dalkaan ku noolna waxaan kula dar daarmayaa iney ilaaliyaan sharafteenna iyo ixtiraamka ay heystaan.

Mahadsanidiin

Abdi Jeite

Did you like this? Share it:

LEAVE A REPLY

Please enter your comment!
Please enter your name here