Wasiirka Warfaafinta iyo Guddoomiyaha Gobolka oo soo xiray tartan cilmiyeedka Warbaahinta Qaranka “SAWIRRO”

0
8575

Wasiirka Warfaafinta, dhaqanka iyo Dalxiiska ee Xukuumadda Soomaaliya Eng, Cabdiraxmaan Cumar  Cismaan Yariisow iyo Guddoomiyaha Gobolka Benaadir ahna duqa Muqdisho Mudane Thabit Cabdi Maxamed ayaa caawa si wada jir ah u soo gabo gabeeyay tartan cilmiyeedka Warbaahinta Qaranka oo sanadkan ay ka qeyb galeen 28 degmo oo ka kala tirsan gobollada dalka oo ay ugu badnaayeen degmooyinka Gobollka Banadir.

Munaasabadda xiritaanka tartan cilmiyeedka Warbaahinta Qaranka waxaa ka kaloo ka qeyb galay guddiga tartan cilmiyeedka, Agaasimaha telefishinka Qaranka, Agaasimaha Radio Muqdisho iyo Agaasimaha Guud ee Wasaarasdda Warfaafinta.

Mudane Cabdifataax Daahir Jeyte Agaasimaha Radio Muqdisho kulanka hadal kooban ka jeediyay ayaa uga mahadceliyay tartamayaasha ka qeyb galay tartanka sida quruxda badan ee ay ku soo bandhigeen aqoontooda, isagoo mahadcelin gaar ah u jeediyay daadihiyeyaasha iyo gudiga tartanka oo u dhabar adeegay muddada uu tartanka socday, waxaana uu ka codsaday Madaxda Wasaaradda iyo Maamulka Gobolka Benaadir inay gacan ka geystaan sidii aqoonta uu tartanka xambaarsanaa bulshada loogu daabici lahaa.

Agaasimaha Telefishinka Qaranka Mudane Liibaan Cabdi Cali ayaa sheegay in sanadka soo socda ay wax badan ka badali doonaan tartan cilmiyeedka Warbaahinta Qaranka, isagoo xusay in tani ay tahay talaabo aad u wanaagsan oo mudan in la joogteeyo, maadama sanadkan lagu soo kordhiyay in muuqaalo laga soo duubay Degmo weliba bulshadana lala wadaagayay, si ay u bartaan horumarka ka jirta degmada habeenkaas tartameysa.

Agaasimaha Guud ee Wasaaradda Warfaafin, dhaqanka iyo Dalxiiska ee Xukuumadda Soomaaliya Mudane Cabdiraxmaan Yuusuf Sheekh Al-Cadaala ayaa uga mahadceliyay madaxda Wasaaradda iyo Maamulka Gobolka Benaadir taabo gelinta tartanka, isagoo adkeeyay in xoogga la saaro sidii cilmigii laga kororsaday Tartanka laga dhigo buugaag, si ay u tixraacaan jiilka soo koraya.

Guddoomiyaha Gobolka Benaadir ahna duqa Muqdisho Mudane Thabit Cabdi Maxamed ayaa ugu horeyn hambalyo u diray tartamayaasha Warta Nabadda ee ku guuleystay tartanka sanadkan iyo tartamayaasha Dhahar oo kaalinta labaad ee tartanka soo galay, waxaana uu xusay inay tahay in tartanka uu fududeeyay inay isku bartaan dhallinyarada ku nool gobollada dalka.

Guddoomiyaha Gobolka oo tacsi u diray dadkii dhawaan ku dhintay qaraxyadii ka dhacay caasimada ayaa ugu baaqay shacabka inay xoojiyaan la shaqeynta ciidamada Nabadgelyada si loo xaqiijiyo amniga caasimadda, loogana hortago dhagaraha ay maleegayaan maleeshiyaadka argagixisada Al-Shabaab.

Wasiirka Warfaafinta, dhaqanka iyo Dalxiiska ee Xukuumadda Soomaaliya Eng Cabdiraxmaan Cumar Cismaan Yariisow oo soo xiray tartan cilmiyeedka ayaa ugu horeyn maamulka gobolka uga mahadceliyay taabo gelinta tartanka, isagoo hambalyo taa la mid ah u diray tartamayasha kala galay kaalimaha 1aad, 2aad iyo 3aad oo kala ah Warta Nabadda, Dhahar iyo Shibis oo ka kala tirsan gobollada Benaadir iyo Sanaag.

Wasiir Eng, Yariisow ayaa uga mahadceliyay howlwadeenada Warbaahinta Qaranka iyo guddiga sida gaarka ah isugu howlay in bulshada la gaarsiiy cilmi, waxaana uu xusay in tartanka uu noqon doono mid ay dhiirigelin u sameyso dowladda.

 

 

Sawir Qaade:- Mohamed White-ka

Did you like this? Share it:

LEAVE A REPLY

Please enter your comment!
Please enter your name here