Agaasimaha SONNA oo Tababar u furay Shaqaale ka tirsan Wakaaladda

883

Agaasimaha Wakaalada Wararka Qaranka Soomaaliyeed ee SONNA Mudane Cabdulaahi Sheekh Cabdi raxmaan Heybe ayaa maanta daah furay Tababar aqoon kororsi ah oo la siinayo Shaqaale ka mid ah Wakaalada SONNA gaar ahaan qeybta Carabiga.

Tababarkan ayaa ku saabsan sida loo diyaariyo Warbixinada iyo Faallooyinka, waxaana uu socon doonaa mudo labo Maalin ah.

Agaasime Cabdulaahi Sheekh Cabdi raxmaan Heybe oo Munaasabad ka hadlay ayaa sheegay in Tababarka loo furay Shaqaalaha SONNA gaar ahaan qeybteeda Carabiga uu yahay mid muhiim u ah Shaqaalaha, wax badana kusoo kordhin kara hawsha Wakaalada ee dhinaca Carabiga.

Sidoo kale Agaasimaha Wakaalada SONNA ayaa xusay inay ka go’an tahay Kobcinta aqoonta Shaqaalaha Wakaaladda Qaranka, si Wakaaladda ay ula tartanto Wakaaladdaha Caalamka, iyadoo qorshaha uu yahay in qeybaha kale ee Wakaaladda sida Soomaaliga iyo Ingiriiska loo qabto Tababaro heerkan oo kale ah si kor loogu qaado Aqoontooda iyo Xirfadooda, isagoona ku amaanay Maamulka Wasaaradda Warfaafinta oo ay ugu horeeyaan Wasiirka iyo Agaasimaha Guud dadaalka ay ku bixinayaan sidii kor loogu qaadi lahaa xirfada Shaqaalaha SONNA.

Tababarkan waxaa bixinaya Ustaad Cabdi raxmaan Sahal Yuusuf oo ka mid ah Lataliyayaasha Wasaaradda isla markaana ah Khabiir ku taqasusay sida loo diyaariyo Faallooyinka iyo Warbixinada.

Tifaftiraha guud ee Wakaalada SONNA Cabdi raxmaan Cabdulaahi Maxamed iyo Madaxa qeybta Carabiga Cumar Faarax Cali ayaa bogaadiyay Tababarkan, iyagoona tilmaamay inuu muhiim u yahay Shaqada Qaranka ay u hayaan Shaqaalahan ka tirsan qeybta Carabiga ee Wakaaladda SONNA.

Wakaaladda Wararka Qaranka Soomaaliyeed ee SONNA oo la aas aasay1964 5-tii bishii Janaayo oo burburkii dalka hakad uu ku yimid howlaheeda shaqo ayaa dadaal ugu jirta inay la tartanto wakaaladdaha dhigeeda ah ee Dalalka Caalamka, iyadoo dad badan ay bogaadiyeen Howlaha ay wado wakaaladda oo muhiim u ah Hormarka dalka.

Did you like this? Share it:

LEAVE A REPLY

Please enter your comment!
Please enter your name here