AMISOM oo xaqiijisay in askarooda ay ku lug yeesheen iibinta qalabka loo keeno

0
2853

Howlgalka midowga Afrika ee AMISOM ee Soomaaliya ayaa xaqiijiyay in shan kamid ah askartooda lagu xirey magaalada Muqdisho maaalintii shalay kadib markii lagu eedeeyay in ay iibinayeen qalab ciidanka iyo sahey kale.
War qoraal ah oo laga soo saaray xafiiska wakiilka gaarka ah ee midowga Afrika ee Soomaaliya ayaa lagu sheegay in askarta lagu soo qabtay howlgal si wadajir ah ay u sameeyeen ciidanka booliiska Soomaaliyeed iyo kuwo AMISOM taas oo ka dambeysay baaritaano lagu sameeyay arintan.
AMISOM waxaa ay horey u heshay warar sheegaya in qaar kamid ah askarta ay ku lug leeyihiin falal sharci daro ah waxaana la sameeyay baaritaan ku saabsan arintan oo AMISOM ay la kaashatay booliiska Soomaaliya. Baaritaankii ayaa ugu dambeyntii keenay in askarta la qabto ayagoo gacanta kula jira iibinta shidaal iyo jawaanada ciida lagu shubo loona isticmaalo difaaca.
AMISOM dulqaad uma heyso kuwo u dhaqma si xirfad la’aanta ah oo ka tirsan askartooda dambiiliyaasha waxaa ay mudanayaan ciqaab waafaqsan sharciga. Dhammaan ciidanka ka tirsan AMISOM waa in ay u hogaansanaadaan sharciga iyo anshaxa qofkii ka waacda hanaankaas ciqaab ayuu la kulmayaan tanna waxaa lagu dhaqangelin doonaa heshiiskii dowladda Soomaaliya iyo howlgalka midowga Afrika ee AMISOM ka dhaxeeyay isla markaana lagu unkey howlgalka.

AMISOM, oo la shaqeynaysa ciidanka booliiska Soomaaliyeed ayaa waxa ay wadi doonaan baaritaanada sida oo kale ah si xididada loogu siibo arintan. Waxcaana la qaado doonaa tallaabooyinka aas aasiga ah si loo joojiyo ficilada noocaan ah.
Howlgalka midowga Afrika ayaa waxaa ay ka badan yihiin 22,000 oo askari kuwaas oo ka shaqeynaya soo celinta nabadda iyo xasiloonida Soomaaliya waxaana go’aankoodu yahay in ay hadafkaas xaqiijiyaan ma ahan in ay noqdaan kuwo daneystiyaal ah sida hadda ay sameeyeen tiro yar oo kamid ah askarta.

Did you like this? Share it:

LEAVE A REPLY

Please enter your comment!
Please enter your name here