Aqoon isweydaarsi ku saabsan nidaamka Federaalka ah oo lagu qabtay Gaalkacyo

778

Aqoon isweydaarsigaan oo ay soo qaban qaabiyeen  ururka dhallinyarada Galmudug, loogana hadlayey arrimo la xiriira nidaamka Federaalka oo hadda qorshihiisu ka socdo dalka Soomaaliya sida looga dhaqan gelin karo dalka ayaa lagu qabtay magaalada Gaalkacyo ee xaruunta gobolka Mudug.

Dood cilmiyeedkan oo ahaa mid hal maalin ah ayaa waxaa ka qeyb galey dhallinyaro iyo ardayda ku dhaqan magaalada Gaalkacyo qeybahooda kala duwan’ ayadoo  ugu horreyn uu madasha ka hadlay guddoomiyaha ururka dhallinyarada gobolka Mudug Cabdiraxmaan Macalin Maxamuud (Nadaara)

“Barnaamijkaan waxa uu yahay mid aqoon isweydaarsi ah, loogana hadlayo Federaalka ama waxa loo yaqaano isku darka wadaaga, wuxuuna qeyb ka yahay fooramo u qorsheeysan dhallinyarada Galmudug, qodabkaan ayaana
noqday midka kowaad ee ay dhallinyaradu fooramo ka qabato, iyadoo ay jiraan qorshayaal kale” ayuu yiri Cabdiraxmaan.

Bile Tahaliil Cilmi oo ka mid ahaa dhallinyarada soo qaban qaabisay  kulanka ayaa tilmaamay in Nidaamka Federaalka ah uu faa’iido badan u leeyahay bulshada, isla markaana ay muhiimtahay in dhallinyarado ay wax badan ka fahmaan.

“Nidaamka la yiraahdo federalism waa awoodda oo la qeybiyay iyo kheyraadka oo la wadaago, waxaana wadaagaya dowlada federaalka ah iyo dowlad gobaleedyada, dowladihii ugu horeeyay ee isticmaala Nidaamkan, waxaa ka mid ah Mareykanka, Canada, Ruushka, dowladahaas ayaa si wanaagsan u isticmaalaya ilaa hade”ayuu yiri Bile.

Cabdullaahi Macalin Xasan oo xubin ka ah ururrada dhallinyarada ayaa yiri “ka hadalka arintaan waxaan ku dooranay maadaama dalkeena ay haatan ka socdaan sidii loo hirgalin lahaa nidaamka federaalka, si aan wax isaga
niraahno una fahano nidaamka federaalku faa’iido inuu leeyahay dalkeena iyo dadkeena”

Did you like this? Share it:

LEAVE A REPLY

Please enter your comment!
Please enter your name here