Baarlamaanka oo ka hadlay wax ka badal lagu sameeyo Hindise sharciyeedka Guddiga Xuduudaha

0
725

Kalfadhiga Shanaad fadhiisa 20aad ee maanta waxaa shir guddoominayay Guddoomiye ku-xigeenka Labaad ee baarlamaanka Federaalka ah ee Soomaaliya Mudane Mahad Cabdalla Cawad ayaa waxaa looga hadlayay soo jeedin ay qaar ka mid ah mudanayaasha Baarlamaanka oo ku aadan in wax laga badalo qodobo ka mid Hindise Sharciyeedka Guddiga Xuduudaha iyo Federaalka ka hor inta aan la meel marin.

Xildhibaan Cabdiqaadir oo ka mid ah mudanayaasha soo jeediyay in wax ka badal lagu sameeyo qodobo ka mid ah Hindise sharciyeedka ayaa xildhibaannada u sharxay qodobada ay doonayaan in wax laga badalo.

“1. Qodobka 4aad e Hindise sharciyeedka farqaddisa (A) laga saaro meesha loona dhigo sidatan:- 4(A) in uu sameeyo daraasad ku saabsan kala xulashada nidaamka ku haboon loo dhisi lahaa iyo soohdimaha dowlad goboleedyada xunbnaha ka ah Jamhuuriyada Federaalka ah ee Soomaaliya” ayuu yiri Xildhibaan Cabdiqaadir oo hadalkiisa ku daray Qodobka 17aad farqaddiisa 2aad in lagu sameeyo wax ka badal loo dhigo sidatan:- “Guddiga Xuduudaha iyo Federaalka wuxuu u soo gudbinayaa baarlamaanka Federaalka talooyinkooda ku saabsan dhisidda iyo soohdimeynta xuduudaha dowladaha xubnaha ka ah Jamhuuriyadd Federaalka ah ee Soomaaliya”.

Intaas kaddib Xildhibaan Daahir Amiin Jeesoow oo ah guddoomiye ku-xigeenka guddiga amniga iyo arrimaha gudaha ee Baarlamaanka ayaa xusay in ka guddi ahaan ay wax badan ka badaleen qodobadii horey ugu qornaa Hindise sharciyeedkan Guddiga Xuduudaha iyo Federaalka kahor inta aysan baarlamaanka ka hor akhrinin.

Qaar ka mid ah Xidlhibaannada ayaa taageeray soo jeedinta ah in wax ka badal lagu sameeyo qodobada qaar ee ku qoran ee Hindise sharciyeedkan, halka kuwa kalena ay ku doodeen in lagu qanco dib u habeynta ay ku sooo sameeyeen guddiga Arrimaha gudaha iyo Amniga ee Baarlamaanka.

Sii hayaha Wasiirka Arrimaha Gudaha iyo Federaalka Soomaaliya mudane Cabdullaahi Goodax Barre ayaa ku amaanay hadal soo jeedinta Xildhibaannada ee ku aadan in wax laga badalo qodobada qaar, isagoo mudaneyaasha ka codsaday inay meel mariyaan hindise sharciyeedkan, maadaama uu muhiim u yahay meel marinta Nidaamka Federaalka.

Guddoomiye ku-xigeenka labaad ee Baarlamaanka mudane Mahad Cabadalla Cawad oo shir guddoominayay kalfadhigii maanta ayaa sheegay in hindise sharciyeedka cod la gelin doono maalinta berri ah, waxaana uu Xildhibaannadu ka codsaday in arrintu aysan noqon mid waqti badan qaadata, maadaama shaqooyin badan ay horyaalaan.

Did you like this? Share it:

LEAVE A REPLY

Please enter your comment!
Please enter your name here