Bur burin lagu sameeyay dhul si sharci darro ah looga deganaa Muwaadin Soomaaliyeed

2080

Maamulka Degmada Yaaqshiid ee Gobolka Benaadir ayaa maanta howlo bur burin ah ku sameeyay guryo si sharci darro ah looga dhistay dhul uu iska lahaa muwaadin Soomaaliyeed, kaasi oo ay Maxkamaddu amartay in dib loogu celiyo dhulkiisa.

Howlahan bur burinta oo laga fuliyay dhul ka kooban 16 boos oo ay si sharci darro ay u deganaayeen qoysas, kuna yaalay Waaxda Tawakal ee degmada Yaaqshiid ayaa waxaa ka sameeyay ciidamada amniga dowladda, kuwaasi oo ku guuleystay in ay bur buriyaan dhismayaasha laga dhistay dhulka ay Maxkamadda u sharciyeysay muwaadinkii iska lahaa, kaddin markii guddiga qilaafaadka iyo Garsoorka ee Gobolka ay Maxkamadda horgeeyeen caddeymo muujinaya in muwaadinka uu dhulka isla leeyahay.

Guddoomiyaha Degmada Yaaqshiid Cismaan Maxamuud Cadaawe ayaa sheegay in dadkii deganaa dhulkaasi horey loogu qabtay muddo 20 cisho ay in ay kaga guuraan, ayn ku ekeyd shalay oo Isniin ah, taasina ay keentay in ay maanta bilaabaahan howlaha lagu bur burinayo dhismoyaasha sharci darrada ah, isagoo warqadihii lahaanshiyaha dhulka ku wareejiyay wiil uu dhalay muwaadinkii dhulka iska lahaa.

Guddoomiyaha waxa uu tilmaamay inaysan jiri doonin cid si xoog ah looga haysan karo dhul uu iska leeyahay, isagoo ka digay in si sharci darro ah lagu dhisto dhulal ay leeyihiin muwaadiniin Soomaaliyeed.
Wiil uu dhalay Muwaadinkii iska lahaa dhulka dib loogu celiyay oo hadal kooban Warbaahinta Qaranka siiyay ayaa uga mahadceliyay maamulka Gobolka iyo kan degmada sida ay dib ugu soo celiyeen dhulkii ay sida sahrciga ah ku leeyihiin oo muddo si sharci darro ah looga haystay.

Maamulka Gobolka Benaadir ayaa bilihii la soo dhaafay waday in uu dib hantida ma guurta ah ugu celiyo muwaadiniintii iska lahaa, kaddib markii guddiga qilaafaadka iyo Garsoorka ee Gobolka uu arrimahaasi xaliyay.

Did you like this? Share it:

LEAVE A REPLY

Please enter your comment!
Please enter your name here