Cabdi Jiinow “Dhismaha Maamulka Gobollada Hiiraan iyo Sh/Dhexe waxa uu kaalin ka qaadan karaa dhaqaalaha dalka”

0
1090

Dowladda Federaalka ee Soomaaliya ayaa ku howlan dhismaha Maamulka gobollada Hiiraan iyo Shabeelaha dhexe xili Maamulkan uu yahay kan kaliya ee la sugayo dhismihiisa marka loo eego  dhameystirka iyo hirgelinta Nidaamka Federaalka ah ee ay dowladdu qaadatay.

Guddoomiyihii hore ee gobolka Shabeelaha dhexe Cabdi Jiinoow Calasow oo la hadlay Radio Muqdisho ayaa sheegay in uu soo dhaweynayo in hal Maamul loo sameeyo Shabeelaha dhexe iyo Hiiraan islamarkaana la dadajiyo arrintaasi.

“Waan soo dhaweyneynaynaa dhismaha maamulka Gobolada Hiiraan iyo Shabeelaha dhexe, runtii way mudanyihiin in la da dajiyo dhismaha maamulkaasi” ayuu yiri Cabdi Jiinow

Cabdi Jiinoow ayaa sheegay in gobolada Hiiraan iyo Shabeelaha dhexe ay yihiin kuwa ahmiyad weyn u leh dalka oo leh wax soo saar kaabi kara dhaqaalaha Dowladda Federaalka iyo Dadka deegaanka intaba.

“Waa labo gobol oo miisaaniyadda ka timaada qeyb lixaad leh ka qaadan kara dhaqaalaha dalka, waxa ay ka midyihiin gobolada kaabayaasha dhaqaalaha ee dalka, runtii waxaan dhihi karaa haddii la isku daro inay noqonayaan maamul u taagan dhaqaale ahaan iyo siyaasad ahaan, isla markaana uu noqon doono maamul ay ku tiirsanaadaan gobollada kale ee dalka” ayuu yiri Cabdi Jiinow.

Gudoomiyihii hore ee gobolka Shabeelaha dhexe ayaa soo jeediyay in laga fogaado wax waliba oo dib u dhigi kara dhismaha Maamulka, oo wadatashi la geliyo arrimaha keeni kara khilaafka sida halka lagu qabanayo Shirka Maamul u sameynta oo uu ku tilmaamay inay u baahatanay in la geliyo wada tashi.

“Masiirku dad ayuu kala dhexeeyaa, waana labo gobol oo la isku darayo, marka in hal qof uu dhaho aniga ayaa marti gelinayo shirka, waxa ay u baahantahay in laga wada tashado, marka ma cuntameyso in qof kaliya uu kaligiis go’aan iska gaaro” ayuu hadalkiisa ku daray Guddoomiyihii hore ee Gobolka Shabeelaha Dhexe.

Did you like this? Share it:

LEAVE A REPLY

Please enter your comment!
Please enter your name here