Cabsi laga qabo in markale uu fatahaad sameeyo Webiga Shabeelle ee Beladweyne

Mnaamulka iyo qeybaha bulshada ku dhaqan Beladweyne ayaa markale cabsi ka qaba in uu fatahaad sameeyo Webiga Shabeelle kaddib markii maalmahan uu roob xoog leh ka da’ayay Gobolka, isla markaana uu webiga biyo horleh la ciir ciirayo.

Guddoomiye ku-xigeenka arrimaha bulshada ee Gobolka Hiiraan Sheekh Xuseen Cismaan Cali oo la hadlay Radio Muqdisho ayaa tilmaamay inay jiraan xaafado ka mid ah magaalada oo biyo horleh soo galay, kaddib markii Webiga Shabeelle uu soo buuxiyay, dadkuna ay weli ka maqanyihiin magaalada.

Sheekh Xuseen Cismaan Cali ayaa xusay in muddo saddex maalin ah uu xirnaa garoonka diyaaradaha sababo roob ka da’ay Beladweyne awgeed, ayna rajeynayaan in maalinta beri oo khamiis ah uu garoonka dib u bilaabi doono adeegyadiisa, isagoo ntaa ku daray inay jiraan cabsi laga qabo fatahaad kale oo horleh.

“Cabsi ayaa jirta, cabsidana waxaa keenay in webiga uu markale biyo keenay, runtii roobkii dhawaan ka da’ay Beladweyne waxa uu ahaa mid saacado badan qaatan, taasi oo keentay in webiga uu biyo keeno”.ayuu yiri Guddoomiye ku-xigeenka arrimaha bulshada ee Gobolka Hiiraan.

Sidoo kale Saciid Cabdi Xasan oo ka mid ah dadka beeraleyda ee ku nool magaalada Beladweye oo la hadlay Warbaahinta Qaranka ayaa sheegay in webiga uu keenay biyo cusub, isla markaana dadku ay ka walwalsanyihiin fatahaad kale oo ka dhasha biyaha,

Saciid ayaa xusay in xaafadaha qaar ee magaalada Beladweyne ay biyo fadhiyaan, isla markaana ur darteed aan la geli karin.

Dr Axmed Khaliif Isu-duwaha Wasaaradda Caafimaadka Hirshabeelle ee Gobolka Hiiraan ayaa sheegay in fatahaadda webiga Shabeelle ay ka dhasheen cudurro ay ka mid yihiin nafaqo darri soo wajahday carruurta iyo dadka da’da ah iyo kuwa kale oo ku dhaca dheefshiidka.

Dr Axmed Khaliif ayaa xusay inay wacyigelin siiyaan bulshada magaalada, si looga hortago cudurada ka dhalan kara biyaha wasaqeysan ee magaalada fadhiya., dadkuna ay biyaha iska karkariyaan.

“Dadka reer Hiiraan waxaan farayaa inay is caawiyaan, runtii dad badan oo Soomaaliyeed oo meelkasta ka kala yimid ayaa caawiyay walaalahooda, iyagana dhankooduna waan baraarujinayaa, waa in laga fekaro mustaqbalka sidii laga yeeli lahaa biyaha marna la weynayo ee baar noqoneyso, marna biyo baxo looga cararayo magaalada, sidoo kale dadku inay biyo nadiif ah cabaan, maadaama musqulihii iyo biyaha fatahaadda ay isku darmeen kuwaasi oo magaalada weli dhexyaalo xaafadaha qaar” ayu yiri Dr Axmed Khaliif.

 

LEAVE A REPLY

Please enter your comment!
Please enter your name here