Carruur baratay daruusta Diiniga ah oo abaalmarino lagu guddoonsiiyay dalka Koonfur Afrika “SAWIRRO”

0
1538

Munaasabadaan oo aheyd mid si heer sare ah loo soo agaasimay ayaa waxaa ka qeybgalay mas’uuliyiin ka kala socotay Safaaradaha Soomaaliya iyo Sacuudiga ay ku leeyihiin dalka South Africa, Xubno ka socday Ururka Islaamka South Africa, marti sharaf kala duwan oo isugu jira Soomaali iyo Ajaanib, waaldiiinta ay carruurtooda wax ka bartaan Madrsada Imamu Bukhaari iyo qeybaha kala duwan ee Soomaalida ee ku nool magaalada Pretoria.

Maamulaha Madrasada Imamu Bukhaari Sheekh Maxamed Xakaar ayaa ugu horeyn ka hadlay madasha lagu qabtay xafladda, waxaana uu sheegay in ardayda wax ka barata madrasada loo dhigo ilaa sideed maado oo diini ah, isla markaana maanta ay ka qaadanayaan shahaadooyin kala duwan.

Sheekh Maxamuud Adar oo ah Guddoomiyaha Golaha Fulinta Hey’adda Culimada Al-Bayaan ee gacanta ku heysa inta badan Masaajida iyo goobaha waxbarashada ee Soomaalida ku leeyihiin dalka South Africa ayaa waalidiinta ugu baaqay in ay kaalin weyn ka qaataan waxbarashada carruurtooda.

Sheekh Qorane Cabdi oo ka mid ah Aas aasayaasha Hey’ada Culimada Al-Bayaan oo goobta ka hadlay ayaa sheegay ku dhawaad 20 sano oo ay shaqeyneyso hey’adaan ay dalka South Africa ka sameeyeen in ku dhow 15 goobo waxbarasho, isla markaana ay dhigtaan ku dhawaad labo kun iyo shan boqol (2,500) arday oo isugu jira Soomaali iyo Ajaanib kale.

Uqaabilsanaha Arrimaha Diinta ee Safaarada Sacuudiga ay ku leedahay dalka South Africa Sheekh Cumar Axmed oo madasha hadal kooban ka jeediyay ayaa Soomaalida ku amaanay in ay yihiin dad ku wanaagsan fidinta Diinta Islaamka iyo xifdinta Qur’aanka Kariimka.

Xoghayaha kowaad ee Safaaradda Soomaaliya ay ku leedahay dalka South Africa Ismaaciil Cabdalle Soomane ayaa ugu baaqay waalidniinta Soomaalida iyo qeybaha bulshada in ay taageeraan Maamulka iyo Macalimiinta Madrasada si ay howsha ay hayaan uga soo baxaan si wanaagsan.

Mas’uuliyiinta madasha isugu timid ayaa si wadajir ah waxaa ay hadiyado u gudoon siiyeen ardayda kaalmaha hore ka galay imitxaanaadkii la qaaday iyo kuwa ugu wanaagsan ee fasalada, waxaa sido kale hadiyado la siiyay qaar ka mid ah Hooyooyinka Soomaalida ee magaaladaasi oo ka mid ah ardayda Qur’aanka iyo Axkaamta kale ee Diiniga ah la baro.

 

By C/laahi Maxamuud Amiin. C/laahi Qorshe

Johannesburg-South Africa.

Did you like this? Share it:

LEAVE A REPLY

Please enter your comment!
Please enter your name here