Carruur ku geeriyootay dab qabsaday Iskuul ay dhiganayeen

Ugu yaraan 20 carruur ah oo ka soo jeeday qooysas danyar ah ayaa geeriyooday, kaddib markii uu dab qabsaday Iskuul xanaanada iyo barbaarinta ah oo ay dhiganayeen, sida ay xaqiijiyeen saraakiisha dowladda Niger.

“20 carruur ah ayaa ku dhintay dabkan oo aan la garaneyn waxa uu ka dhashay” ayuu yiri madaxa waaxda dab damiska Niger Colonel Bako Boubaca.

Xubin ka tirsan ururka macallimiinta Niger ayaa sheegay in Iskuulkan oo dhismahiisa u badnaa carshaan iyo alwaax oo ku yaal xaafadda Pays Bas, islamarkaana ay dhiganayeen ku dhawaad 800 oo arday ah oo ay ku jireen carruur ku jirtay qeybta barbaarinta ubadka.

“Dabku wuxuu u muuqday inuu ka billowday agagaarka iridda iskuulka, mana jirin irid kale oo deg-deg looga bixi karo marka ay yimaadaan xaaladaha nuucan ah, dad badan ayaa gudaha iskuulka ku go’doomay, ardaydana waxaa khasab ku noqotay inay darbiga ka boodaan si ay dabka uga baxsadaan, kuwa ku dhintana waxay u badnaayeen carruurta dugsiga xannaanada” ayuu Mounkaila Halidou.

Sarkaal kale oo ka tirsan waaxda dab damiska ayaa sheegay in 21 fasal uu dabku baabi’iyay, ayna carruurtan ku xanibnaayeen intiii uu socday.

LEAVE A REPLY

Please enter your comment!
Please enter your name here