Ciidamada X.D.S oo howlgal ka dhan ah Shabaab ka wada G/Sh/Hoose

0
1173

Ciidamada Xoogga dalka Soomaaliyeed ayaa waxay howlgal lagu sifeynayo Kooxda Nabadiidka ee Al-Shabaab  ka wadaan deegaano iyo degmooyin ka tirsan Gobolka Shabeellaha hoose.

Guddoomiyaha Gobolka Shabeellaha Hoose Ibraahim Aadan Najax oo la hadlay Radiyo Muqdisho ayaa sheegay in Ciidamada Xoogga dalka howlgal ka dhan ah Al-Shabaab ka wadaan degmooyinka Sablaale iyo Kurtunwarey oo ka wada tirsan Gobolka Shabeellaha hoose,isagoona sheegay in Ciidamada Dowladda inta howlgalka ay socdeen ku gubeen gaadiid dagaalka oo maleeshiyaadka Al-Shabaab lahaayeen.

“ Degmooyin badan ayay hadduu Alle yiraahdo ka howlgalayaan, degmada Sablaale iyo deegaanada hoos yimaada sida Sablaale yare iyo weyn oo xarunta degmada Ku taalo iyo degmada Kurtunwarey oo ay ciidamada ku gadaaman yihiin,howlgalka hadduu soo dhameystirmo inshallah warbixinta oo dhameystiran idin sheegi doonaa,” ayuu yiri Guddoomiyaha Gobolka Shabeellaha hoose Ibraahim Aadan Najax.

Ibraahim Aadan Janax,Guddoomiyaha Gobolka Shabeellaha hoose oo hadalkiisa sii wata ayaa sheegay in dhamaan degmooyinka howlgalka ka socdaan sida Sablaale iyo Kurtunwarey laga faramaroojiyay Al-Shabaab,islamarkaana Ciidamada Geesiyaasha Soomaaliya ay Maleeshiyada Al-Shabaab ka gubeen ilaa iyo saddex gaari oo nuuca dagaalka ah.

Ciidamada Xoogga dalka Soomaaliya oo kaashanaya Ciidamada AMISOM,ayaa howlgal lagu ciribtirayo maleeshiyada Al-Shabaab waxay ka bilaabeen Gobolka Shabeellaha Hoose,waxayna ciidamada howlgalkaasi ka gaareen guul la taaban karo.

Did you like this? Share it:

LEAVE A REPLY

Please enter your comment!
Please enter your name here