Ciidanka booliska Galmudug oo gaari la soo dhacay ku wareejiyay Puntland

4681

Ciidanka booliska Galmudug ee ka howlgala magaalada Gaalkacyo ayaa saaka ku guuleeystay inay gacanta ku soo dhigaan gaari land cruser ah oo ay laheyd wasiir ku xigeenka wasaarada haweenka dowlad gobaleedka Puntland Farxiyo Yuusuf Xirsi, kadib howlgalo ay ka sameeyeen deegaanada gobalka Mudug.

Gaariga ayaa laga soo dhacay saddex maalin ka hor deegaano ka tirsan kuwa dowlad gobaleedka Puntland isla markaana loola soo baxsaday dhanka deegaanada Galmudug.

Taliyaha qeybta booliiska Gobalka Mudug ee Galmudug Gaashaanle sare Maxamed Nuur Cali Gadaar ayaa Warbaahinta Qaranka u xaqiijiyay in burcaddii gaariga soo dhacday lagu guuleystay in gacanta lagu soo dhigo, kuwaasi oo uu sheegay inay ku xiranyihiin saldhiga magaalada Gaalkacyo.

“Gaarigaan waxaa si sharci dara ah uga soo dhacay Wasiir ku-xigeenka Wasaaradda Haweenka darawalkii gaariga u waday, waxaana uu damcay in uu gato, isagoo ula soo baxsaday dhanka Galmudug, laakiin nasiib wanaag waxay noqatay Wasiirka gaarigeedii oo nabad qaba in aan furihiisii gacanta ka saarno meeshay doontana ay u wadan karto tuugiina xabsiga uu ku jiro” ayuu yiri Taliyaha qeybta booliska Galmudug.

Wasiir ku xigeenka Wasaaradda Haweenka ee dowlad gobaleedka Puntland Farxiyo Yuusuf Xirsi ayaa dhankeeda uga mahad celisay ciidanka booliiska Galmudug sida ay markasta ugu heelanyihiinn ka hortagidda falalka noocaan oo kala ah iyo in lagu wareejiyo gaarigeedii oo badqaba, waxaana dhanka kale Wasiirku ay soo dhaweeysay wada shaqeynta ciidamada booliska Gobalka Mudug ee Galmudug, iyadoo ugu baaqday in ay sii xoojiyaan howsha lagaga hortagayo cid kasta oo isku dayda in falal ammaanka wax u dhimi karta ay ka sameyso deegaannada gobalka Mudug.

Did you like this? Share it:

LEAVE A REPLY

Please enter your comment!
Please enter your name here