Ciidanka Xoogga Dalka Oo Howlgal Ka Dhan Ah Maleeshiyada Al-Shabaab Ka Sameeyay Gobolka Shabeelaha Dhexe

Ciidamada Xoogga Dalka gaar ahaan qeybta Taliska 27-aad ee ka howlgalla deegaannada Hirshabeelle ayaa waxay howlgal lagu xaqiijinayo amniga ka sameeyeen waddada isku xirta Jowhar iyo Balcad iyo deegaanno kale oo dhowr ah.

Howlgalkan oo lagu baacsanayay maleeshiyada Al-Shabaab ayaa ciidanka Xoogga Dalka waxay ku gaareen deegaano badan oo la tuhunsanaa iney ku dhuumaaleysanayeen maleeshiyada Al-Shabaab, inkastoo markii dambe ay isaga carareen markii ay ka war heleen in ciidanka Xoogga Dalka ay ku soo wajahan yihiin.

Deegaanada ay ciidanka howlgalka ka sameeyeen waxaa ka mid ah Jariirow, Gololeey Moobleen, Dhumaleey, Madax Gisi, Lafa-garen, Saarsaare, Cadiga Moobleen,Buulo mareereey iyo Gumareey oo dhammaantood ka wada tirsan gobolka Shabeellaha Dhexe.

Ciidanka Xoogga Dalka ayaa lug ku soo maray inta badan deegaanadaas,waxaana howlgalkaas hoggaaminayay taliyaha qeybta 27-aad ee ciidanka Xoogga Dalka Generaal Axmed Maxamed Calasow “ Tareedisho” waxaana ku wehlinayay mas’uuliyiin ka tirsan maamulka gobolka Shabeellaha Dhexe.

Taliye Tareedisho ayaa ciidanka ku bogaadiyay howlgalka ay ku qaadeen maleeshiyada Al-Shabaab,Isagoo ujeedka howlgalka ku sheegay sidii argagixisada looga badbaadin lahaa shacabka adeegsanaya wadada isku xirta magaalooyinka Jowhar iyo Balcad oo marar qaar dhibaatooyin kala kulmaya kooxda Al-Shabaab.

Sidoo kale, Taliyaha Ciidanka Xoogga Dalka Generaal Tareedisho ayaa inta uu howlgalka ka dhan ah maleeshiyada Al-Shabaab socday wuxuu kormeer qiimeyn ah ku tegay fariisimaha ciidanka Xoogga Dalka ku leeyihiin wadada isku xirta Jowhar iyo Balcad gaar ahaan deegaanada Raaxooy, Qalimow iyo Garsaale.

Ciidanka Xoogga Dalka ayaa mar kasta heegan ugu jira sidii shacabka Soomaaliyeed kaga badbaadin lahaayeen dhagarta ay maleegayaan argagixisada Al-Shabaab

LEAVE A REPLY

Please enter your comment!
Please enter your name here