Colaaddii Bariga Gobolka Mudug oo lagu wado in saacadaha soo socda xal waara laga gaaro

Taliyaha Ciidanka Dhulka ee xoogga dalka Soomaaliya iyo saraakiisha qeybta 21 aad ee xoogga dalka ayaa wada dadaallo lagu xalinayo beelo walaalo ah oo dhawaan ku dagaallamay deegaannada Bariga Gobolka Mudug ee kala ah Afbarwaaqo iyo Tawfiiq.

Sareeyo Guuto Cabdixamiid Maxamed Dirir oo hogaaminayay wafdiga saraakiisha ah ee gaaray deegaannada lagu dagaalamay ayaa ku guuleystay inay kulamo gaar gaar ah la qaateen waxgaradka beelaha Walaalaha ah ee ay dirirtu dhex martay, waxaana uu intaa ku daray in haatan uu meel gabo gabo ah marayo dadaallada lagu heshiisiinayo labada dhinac.

Shirka lagu heshiisiinayo beelaha Walaalaha ah ee ku dagaallamay bariga Gobolka Mudug

Taliyaha Ciidanka Dhulka Dowladda Soomaaliya ayaa tilmaamay in saacadaha soo socda ay waxgaradka labada beelood shaacin doonaan inay qaateen nabadda, ayna diyaar u yihiin inay dhaqan geliyaan heshiiska haatan laga gaaray colaadda.

“Howlaha aan wadno waa nabadeynta beelaha Walaalaha dagaallamay, haddana meel fiican ayay mareysaa, Insha Allah saacadaha soo socda waxaan rajeynayaa in labadii beelood oo wada jooga ay ku dhawaaqi doonaan inay Nabad wada qaateen oo ay halkaasi xabad joojin ka dhaceyso” ayuu yiri Sareeyo Guuto Cabdixamiid Maxamed Dirir

Sareeyo Guuto Cabdixamiid Maxamed Dirir ayaa ku baaqay in labada dhinac ay dhaqan geliyaan heshiiska la dhex dhigay, isla markaana ay kor kala socon doonaan nabad ku soo dabaalidda goobihii lagu dagaallamay, isagoo guud ahaan bulshada Soomaaliyeed ka codsaday inay ka shaqeeyaan Nabadda.

 

 

 

 

LEAVE A REPLY

Please enter your comment!
Please enter your name here