Cudurka Jadeecada oo ka dillaacay degaanno ka mid ah Jubbooyinka

Saraakiisha Caafimaadka ee Magaalada Kismaayo ayaa sheegay in 64 Carruur ah oo Labadii Toddobaad ee u dambeeyay uu soo ritay Cudurka Jadeecada lagu Daweynayo Cusbitalka guud ee Magaalada Kismaayo.

15 ka mid ah Carruurtan la xanuunsan Jadeecada ayaa la sheegayaa inay horay u qateen Tallaalka ka hortagga ah ee Dhallaanka la siiyo.

Saraakiisha Cuspitalka weyn ee Kismaayo ayaa sheegay in Carruurtan laga keenay Shanta Xaafadood ee Kismaayo iyo Degaanno kale oo ay ka mid yihiin Jamaame, Buulo-gaduud, Buulo-Xaaji, Beerxaani iyo Cabdalla Biroole oo Jubbada hoose ah iyo Degmada Jilib ee Gobolka Jubbada dhexe.

Caasho Xaaji Maxamed oo la joogta Labo Wiil oo ay Ayeeyo u tahay, lana xanuunsanaya Cudurka Jadeecada ayaa sheegtay, in xilliyo kala duwan ay Ilamahaasi qaateen dhammaan tallaalladii ay dhaqaatiirtu kula taliyeen.

Drs; Maryan Xuseen Maxamed oo ku takhasustay Caafimaadka Hooyada iyo Dhallaanka, ahna ku-xigeenka madaxa qeybta Jadeecada ee Cusbitalka ayaa sheegtay in ay dhacdo mararka qaar inuu Cudurku ku dhaco Carruur la tallaalay, taas oo ay sababi karto haddii tallaalkii ay qaateen ay tayadiisa xumeyd ama shaqaalaha siiyay aanay qabin tababar wanaagsan.

Jadeecadu waxay ka mid tahay Cudurrada aan Dawada lahayn ka hortag mooyee sida ay sheegtay dhaqtaraddu, wxanay Dadka ku boorrisay inay ka faa’iideystaan Cusbitalka ay taageerto hay’adda ICRC oo laga helo Dawooyin Lacag la’aan ah iyo Cuntooyin Nafaqaysan oo Jirkooda soo kaba.

LEAVE A REPLY

Please enter your comment!
Please enter your name here