Culimaa’udiinka oo ka hadlaya waxa ay diinta Islaamku ka qabto gudniinka Fircooniga “SAWIRRO”

Wasaaradda Owqaafta iyo Diinta ayaa tababar u qabatay qaar kamid ah culimaa’udiinta kaas oo ku saabsan waxa ay shareecada Islaamku ka qabti gudniinka fircooniga.

Siminaarka oo ay iska kaashanayaan Wasaaradda iyo Hay’adda UNICEF ayaa waxaa ka qeybgalay Wasiir ku-xigeenka Wasaaradda Awqaafta iyo arrimaha Diinta Macalin Cali Aadan iyo Agaasimaha guud ee Wasaaradda Sheekh Maxamed Kheyroow Aadan.

Shariif Ibraahim Cabdullahi oo bixinaya darsiga la xiriira gudniinka ayaa sheegay in sharciga Islaamka uusan qabin gudniinka Fircooniga ah, sidaasi awgeedna loo baahan yahay in looga deydo sida ay qabto Sunnada Nebigeena Muxamed N.N.K.H.

“Gudniinka waa labo, mid waa Sunno , midna waa Fircooni, midka Sunnada waxaa looga dayanayaa Nabiga N.N.K.H, imaa kan kale, waa dhaqankii Fircoon, oo markii uu gumeysanayay Reer Banii Isra’il Gabdhaha u gudi jiray si aan aheyn Sunnada Rasuulka”ayuu yiri Shariif Ibraahim.

Wasiir ku-xigeenka Wasaaradda Awqaafta iyo arrimaha Diinta Macalin Cali Aadan Caddow oo furay tababarka ayaa ku booriyay Culimada in si hufan ay kaga doodaan, waxa uu Islaamka ka qabo Gudniinka Fircooniga ah, iyada oo dooda waxa kasoo baxa lagu saleynayo waxa ay Diinteena ka qabto.

“Waa siminaar loogu tala galay waxa uu yahay Gudniinka, ma jiraa mise ma jiro, muxuuse yahay Fircooniga ah, Diin ayaan leenahay Diinteena waa Islaamka, sida awgeed waxaa waajib ah inaan ku dhaqano Diinteena, marka ujeedadu waxa ay tahay waxa ay Diinteena ka qabto, Culimada ayaan ka dooneynaa inay ka doodaan oo ay kasoo saaraan wax la isku raacsan yahay, Wasaaradda siyaasad ahaan iyo Diin ahaan waajib ayaa ka saaran arrintan, iyada oo kaashaneysa Culimada” ayuu yiri Wasiir ku-xigeenka.

Wasaaradda Awqaafta iyo arrimaha diinta ayaa dhowr jeer oo hore qabatay barnaamijyo Ummadda looga wacyi galinayo Gudniinka Fircooniga ah, oo ka sakoow shareecadda Islaamka uusan qabin qanuunka Dowladda iyo midka Caalamiga ah.

DSC01068 DSC01072 DSC01074 DSC01076 DSC01078 DSC01081 DSC01083 DSC01085 DSC01086 DSC01087 DSC01088 DSC01090 DSC01091 DSC01096 DSC01102 DSC01103 DSC01106 DSC01107 DSC01114

Sawir Qaade:- Farxaan Suleymaan Daahir

 

LEAVE A REPLY

Please enter your comment!
Please enter your name here