Dhammaadka Noloshii Macalin Axmed

Axmed Maxamed Yuusuf wuxuu ahaa Ubax u soo baxay Qoyskiisa iyo Ummada Soomaaliyeed, waxaa la joogay xiligii uu guran lahaa miraha Tacliinta uu bartay, sidoo kalana uu ugu adeegi lahaa dalkiisa iyo dadkiisa, laakiin Maleeshiyaadka Al-Shabaab ayaa sabab u naqday dhammaadka Noloshiisa.

 

Afartii Sano ee ugu danbaysay wuxuu ahaa macalin ka shaqaynayay waxbarista Ubadka Soomaaliyeed, wuxuu macalin ka ahaa Dugsiga Axmed Waayeel ee ku yaala degmada Wadajir.

22-kii Bishaan December, ayuu ku geeriyooday gaari Al-Shabaab ay ku qarxiyeen meel ku dhow Dugsiga Yaasiin Cismaan oo uu ujoogay Tababar ay soo qaban qaabisay Wasaaradda Waxbarashada Soomaaliya.

Dadka yaqaanay Axmed waxay Radio Muqdiso u sheegeen in asaga iyo dhalinyaro kale oo uu hormuud u ahaa ay waqti badan ku bixinayeen waxbarista Caruurta ku jira xeryaha Barakayaasha ah ee ku yaala magaalada Muqdisho, iyagoo si iskood ah isku xilqaamay.

Axmed wuxuu ahaa 25-jir, wuxuuna ku dhashay magaalada Muqdisho sanadku markii uu ahaa 1993-dii, sida ay inoo xaqiijiyeen Qoyskiisa.

Waxbarashadiisa hoose, dhexe, sare iyo heer Jaamacad, wuxuu ku qaatay magaalada Muqdisho, wuxuu bartay Maaraynta Ganacsiga, sidoo kale wuxuu haatan ku jiray qaybta Tababarka Macalinimada ee Jaamacadda Ummadda Soomaaliyeed.

W/D Maxamed Kaafi Sheekh Abuukar

Did you like this? Share it:

LEAVE A REPLY

Please enter your comment!
Please enter your name here