Duqa Caasimadda oo kormeeray waddooyinka biyaha laga dhurayo ee roobabku biyo fadhiisad ka sameysteen “SAWIRRO”

Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa kormeeray qaar ka mid ah  waddooyinka magaalada Muqdisho, kaasi oo uu ugu kuur galayay Howsha ka socta magaalada robabkii ka da’ay iyo shaqadii ay ka qabteen shaqaalaha Dowladda Hoose.

Guddoomiye Cumar ayaa xusay in maamulka uu dadaal ku bixinayo sidii biyaha looga nadiifin lahaa waddooyinka xirmay ee ay roobabku degeen, ayna ka shaqeynayaan Waaxda Nadaafadda dowladda Hoose oo kaashanaya booyado.

“Roobab mahiigan ayaa ka da’ay magaalada, xalay ilaa iyo maanta ayay si xowli ah u da’ayeen magaalada, roobabkii da’ayay ayaa waxa ay sababeen wadddooyin badan oo kuwa magaalada ah ay xirmaan, Raxmad Alle uu keenay waaye, runtii khasaare nafeed ilaa iyo hadda naloo ma soo sheegin, laakiin wey dhacdaa mararka qaarkood, waddooyinka marka ay sidan oo kale noqdaan  booyado ayaan biyaha kaga dhaaminaa”. Ayuu yiri Duqa Caasimadda.

Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa xusay in Maamulka uu muddoonyinkii dambe waday maareynta biyaha fadhiista waddooyinka, ayna jiraan meelo badan oo biyaha tubooyin ka qaada, kuwaasi oo badda ku shuba.

Duqa Caasimadda ayaa shacabka ka codsaday inay dulqaad muujiyaan muddada kooban ee biyaha looga dhurayo waddooyinka qaar ee daadadka ka dhashay roobka fadhiisteen.