Duufaanta Florence oo ku dhufatay Maraykanka gobalada Bariga

621

Duufaanta Florence ayaa saaka oo Jimce ah gaartay xeebaha gobalada North Carolina iyo South Carolina ee xeebaha bariga dalkaasi Maraykanka.

Dabeylaha iyo roobka ay duufaantan wadato ayaa durbaba fatahaad ka dhaliyey qeyb kamid ah labadaasi gobal ee saaran xeebta bada Atlantic-ga, waxaana la filayaa in duufaanta maanta gudaha usii gasho dhulkaasi walow ay hoos u dhaceen awooda dabeylaha duufaantan.

Dad ku dhaw 100 kun qof oo ku nool gobalka North Carolina ayaa la sheegay in guryahooda ay ka go’antahay korontada, xili weli duufaantan wada gaarin gobaladaasi.

 

Guddoomiyaha gobalka North Carolina oo ugu baaqay shacabka inay isaga qaxaan goobaha la filayo inay duufaantan ku dhufato ayaa sheegay in khatarta ugu weyn ay tahay fatahaada la filayo inay ka dhashaan biyaha duufaatan wadato.

Sida ay sheegeen khubarada Duufaantan iyo roobka ay wadato ayaa la filayaa inay muddo sadex maalmood ah keenaan biyo aad u badan oo u dhigma 8 bilood oo roob xariir ah socday, waa siday hadalka u dhigeenee.

Kumanaan kun oo shacab ah oo guryahooda ka qaxay ayaa gabaad ka dhigtay 126 goobood oo ay dowlada u diyaarisay.

Xarunta qaran ee duufaannada Maraykanka ayaa sheegtay in Duufaantan ay ku socoto xawaare aad u sarreeya oo aan kala go’ lahayn islamarkaasna ay halkii saacba ay jareyso dhul ballaaran oo dhan 165 kiloomitar

Waxayna intaasi ku dartay in ay filayso in isbedel yar uun ku yimaaddo inta aysan gaarin xeebaha.

In ka badan 1.7 milyan oo ruux ayaa la qorsheynayaa in laga daad gureeyo gobollada South iyo North Carolina, maryland iyo Virginia.

Mike Sprayberry oo ah madaxa ha’yadda North Carolina Emergency Management, oo dadka ka caawisa sida ay uga jawaabi lahayeen masiibooyinka inay khibrad ka heleen duufaantii dhacday sanadkii 2016-kii ayna yaqaanan sida loo daad gureeyo dad aad u tiro badan.

Madaxweyne Trump ayaa saxiixay amarro badan oo ku aaddan gurmadka degdega ah, wuxuuna sheegay inuu la hadlay dhammaan barasaabyada gobollada ay saameynta ku reebi karto duufaanta.

Ciidammada badda ee Mareykanka ayaa 30 markab u diraya badda si ay xaaladda ula socdaan islamarkaasna uga qayb qaataan dadaallada samata bixinta waa haddii duufaanta ay xeebaha dalkaasi ku dhufato.

Did you like this? Share it:

LEAVE A REPLY

Please enter your comment!
Please enter your name here