FAALO:- Sahankii Nabadda!

1079

Maanta Aadanuhu wuxuu sahminayaa xog kale oo ka daahsoon dadyow badan oo ku nool adduunka kuwasoo loo marayo aqoonta iyo agabka sahlaya, kuwasoo lagu gaaray maskax nadiif ah iyo hogaamiyayaal ku xeel dheer hagida Ummaddaha ay madaxda u yihiin.

Amniga, Aqoonta Hagida hannaanka dowliga ah, Dhaqalaha iyo bulsho leh dareen wadaniyadeed ayaa saldhig u ah horumar walba oo la gaaray la’,aantoodna aysan waxba qabsoomin.

Qarnigaan waxaa bulshooyinka caalamku doonayaan in ay gaaran meelo aysan horey u gaarin Qarnigii tagay, hadii aan si kale u iraahdo waxa ay ku haminayaan horumar ka baaxad weyn kii ay gaaran labadii Qarni aynu soo dhaafnay, tusaale wax soo saarka beeraha, baddaha, xoolaha nool, khayraadka dhulka hoostiisa ku jira, ka faa’iideysiga khayradka biyaha iyo tamarta oo loo adeegsanayo taknaloojiyadda casriga ah.

Hadba dib u eeg akhriste dalkeena iyo dadkeena halka aynu joogno maanta iyo sahanka aynu ku jirno waa hubaal in ay aad u kala fog yihiin oo aysan xita isla jaanqaadi karin marka loo eego hankeena yar iyo himilooyinka aan hor u tebinta lahayn.

Dadyowga ku nool dalalka ka run sheegay hamigooda oo gaaray heer loo soo qaato tusaale, waxaa ay ku gaareen waa wadaniyad iyo iyagoo garanaya waxa ay doonaayaan iyo halka ay ku socdaan Ummadda Soomaaliyeedna ma aysan garan waayin intaas iyo ka badanba, laakiin waxa ay u baahnaayeen hogaamin run ah iyo hogaamiye leh aragti dheer han iyo himilooyin fog.

Bulshada Soomaaliyeed oo maanka ku hayay hagar daamooyinkii la soomaray buqno goynta iyo dibindaabooyinka lala damacsanaa ayaa gartay in dalku u baahan yahay hogaamiye leh aragti dheer han iyo himilooyin fog kasoo dalka ka saari kara dhibta iyo dib u dhaca la haray Ummadda Soomaaliyeed.

Dhibtu ma ahan wax lagu waaro mar ayaana laga baxaa waa hadii la helo aragti bulsho oo mideysan, taasoo soo saari karta xalka iyo ku xiran Alle weyne dedaalkii iyo sahmintii muddada dheer qaadatay oo ay ku doonayaan in ay ku helaan qofkii rumeyn laha rajooyinka iyo riyooyinka aan niyada dhaafsiisneen .

Mudane Maxamed Cabdullaahi Maxamed “Farmaajo” Madaxweynaha dalka iyo Ummadda Soomaaliyeed ayaa noqday hogaamiyihii bulshada ay baadi goobayeen in uu ku hago dhabada horumarka iyo dib u kabayashada dal iyo dadba, codka dheer ee shacabka Soomaaliyeed ayaa noqday mid soo dadajiya isbadal dhan walba leh oo ay siyaasaddu ugu horeyso.

Madaxweyne Farmaajo oo maanka ku haya baaxadda howlaha Qaranka ayaa garowsaday in loo baahan yahay in la badalo albaabka laga soo galo dalka si looga maarmo faro galin shisheeye iyo gacmihii tirada badna ee ku milmay siyaasadda iyo arrimaha dibada dalka oo ah halka ugu muhiimsan dal walba.

Madaxweynaha dalka ayaa Soomaaliya ka dhigay mar kale mid leh go’aan diidmo iyo ogolaansho taas oo ugub ku noqotay kuwii doonayay in ay go’aanada inoo gaaran inaguna aynu adeegayaal u noqono.

Dalku wuxuu u baahna sixidda siyaasadda ladagallanka musuq maasuqa, horumarinta hay’adaha dowliga, xoojinta xiriirka dowlad gobolledyada ee iskaashiga, wax wada qabsiga caalamka, amniga iyo xasilinta dalka, howlahaas oo dhan waxaa looga baahan yahay laanta fulinta oo halbowle u ah Madaxweynaha oo arrimahaas oo dhan ogsoon ayaa Ra’iisul Wasare u soo xushay aqoon yahan ku aragti ah, lehna dareen wadaniyadeed iyo han sare Mudane Xasan Cali Khayre.

Wasiirka kowaad ee laanta fulinta ayaa dusha u dhigtay in la helo Soomaaliyada cusub oo ka fog eex, xatooyada hantida Qaranka, laalush, ku tagri falidda awoodda xafiisyada hay’adaha dowliga ah iyo in la helo isla xisaabtan dhab ah oo cidna looga turin, waana midda keentay in Soomaaliya mar kale caalamku aamino, isla markaana laga cafiyo deymo tiro badan oo lagu lahaa.

Maanta dadkeena Soomaaliyeed waxaa la gudboon in ay la yimaadan dareen lahaanshiyo oo ay kala gartaan mugdi iyo iftiin, run iyo been, sokeeyaha iyo cadowga Ummadda Soomaaliyeeed, waana midda aynu ku gaari karo halka ay gaareen asaageena.

Doorashadii Madaxweynaha dalka waxaa ay soo iftiimisay Wadajirka iyo Midnimada Ummadda Soomaaliyeed, waxaana caalamka tustay in dadka Soomaaliyeed ka run sheegi karaan rabitaankooda.

Dad badan oo ku nool dunida ayaa dadkeena ku tilmaama sifooyin aan dhagaha u wanagsaneen oo ay ka mid yihiin dadkii faqriga ahaa, isla weyna xasidka isku ahaa, dhiigyo cabka ahaa, dhulkii bulsho badeedka, dhulkii aragagixisada iyo kuwa ka sii liita, dhammaan waxaan uga gudbi karnaa inagoo la shaqeyna Madaxda Qarankeena kana ilaalino dhibta iyo cidkasta oo abuureysa in qalaan qal siyaasadeed.

Bulshooyo wadajirkeenu waa guusheena, sixitaanka khaladaadkii hore waa horumarkeena, Madaxdu waxba ma qaban karaan kaligood haddii inagu garbo iyo shidaalba aynu u noqon.

Hadaba fariinteenu waa in bulshaeena ay u istaagto ka shaqeynta horumarka dalka.

W/Q: Sharma’arke Maxamed Warsame

 

 

 

Did you like this? Share it:

LEAVE A REPLY

Please enter your comment!
Please enter your name here