Fatahaada webiga Shabeelle uu ka geystay degmada Mahadaay oo saameyn kala duwan yeelatay

Degmada Mahadaay ee gobolka Shabeellaha dhexe ayaa wajaheysa xaalad bani’aadanimo kaddib markii fatahaada webiga shabeelle ay goysay saddex jiho oo laga soo geli jiray degmada iyo gabi ahaan beerihii ku yiilay duleedka degmada Mahadaay oo dalagyo kala duwan ay ku beernaayeen xilligaas.

Guddoomiye ku xigeenka arrimaha bulshada degmada Mahadaay Saalax Fuleel Xaaji oo la hadlay Radio Muqdisho ayaa sheegay in degmada gabi ahaanba ay ka go’day jidadka soo gala degmada oo ka yimaada tuulooyinka hoostaga iyo magaalada Jowhar ee caasimadda Hirshabeelle,isagoo carrabka ku adkeeyay in sannadkaan aysan wax dalag ah kasoo go’in beeraha degmada.

Guddoomiyaha ayaa sheegay in dhul aad u baaxad weyn oo beero ah ay goysay fatahaada webiga Shabeelle, wuxuuna hay’adaha ku shaqada leh ugu baaqay in gurmad lasoo gaarsiiyo dadka ay saameysay fatahaadaas.

Saalax Fuleel Xaaji guddoomiye ku xigeenka arrimaha bulshada degmada Mahadaay ayaa tilmaamay in dadka ka yimaada meelaha ka baxsan degmada ay biyaha lug ku soo jiiraan maadaama aysan gawaaridu sahal ku geli Karin degmada, inkastoo haatan uu sheegay in ay sii yaraanayaan biyahaan ka dhashay fatahaada webiga.

Maamulka Hirshabeelle iyo hay’adaha gargaarka ayaan wax gurmad ah la gaarin degmada Mahadaay ee gobolka Shabeellaha dhexe oo wajaheysa xaalado kala duwan, sida uu sheegay guddoomiye ku xigeenka arrimaha bulshada degmada Mahadaay.

 

LEAVE A REPLY

Please enter your comment!
Please enter your name here