Galmudug: Al Shabaab waxay dhirbaaxo kulul kala kulantey Ciidanka maamulka Galmudug

25 March 2016: Dowlad Goboleedka Soomaaliyeed ee Galmudug ayaa sheegtay in dagaalka lagula jiro Al Shabab aan la joojin doonin ilaa iyo inta firxadka kooxdaasi argagixisada ah laga sifeynayo guud ahaan degaanka uu maamulka ka taliyo.

Madaxweynaha Galmudug , Mudane Cabdikariim Xuseen Guuleed ayaa sheegay in ciidanka Galmudug ay dhirbaaxo culus ku dhufteen argagixisada Al Shabaab dagaaladii ugu dambeeyay ee degaanka ka dhacay.

“Waxaa cadowga dagaalkii ilaa shaley socday looga dilay ilaa iyo 60 maliishiyaad, iyadoo ilaa iyo 38 maxbuusna laga qabtey. Hubkii ay siteen laga furtey, waxaana u mahad celinayaa shacabka oo iyaguna door aad u weyn ka cayaaray inay dhulkooda u diidaan inuu cadowga sal dhigto’’, ayuu yiri Madaxweyne Guuleed.

Degaanadda sida ba’an loogu jebiyay maliishiyada naf la caariga ah ee Al Shabaab ayaa waxaa ka mid ah Dinooda, Jiray, Bali- Hawd iyo Galhagoog.

Maliishiyaadka cadowga ku ah nabadda iyo horumarka ummadda ee Al Shabaab ayaa markii lagu jebiyay degaanka maamulka Puntland u soo baxsadey dhanka Galmudug, iyadoo ujeedkooda uu ahaa inay ku dhuumaaleystaan halkaasi, kadibna ay ka fuliyaan falalkooda arxan darrada ah ee lagu waxyeeleynayo shacabka Soomaaliyeed.

Madaxweynaha maamulka Galmudug, Mudane Cabdikariim Xuseen Guuleed ayaa ugu dambeyn u sheegay shacabka reer Galmudug in walow Al Shabaab lagu jebiyay degaanka Galmudug, haddana loo baahanyahay in gacan weyn laga geysto hawlgalka guud ee milateri ee dalka oo dhan looga xorreynayo Al Shabaab.

 

LEAVE A REPLY

Please enter your comment!
Please enter your name here