Garoowe oo lagu xiray suxufiyiin ka tirsan Idaacadda Daljir

2217

Ciidamada amniga Garoowe ayaa barqanimadii saaka waxay xireen laba wariye oo u shaqeynayey idaacadda Daljir oo ah idaacad xarumo ku leh dhammaan deegaanada Puntland iyo Gobollada dhexe ee dalka, kuwaas oo ciidanka boolisku ay ka kaxeeysteen goobtooda shaqada.

Labada wariye ayaa midkood wuxuu Agaasime ka ahaa idaacadda Daljir xarumaheeda Boosaaso iyo Garoowe, waxaana lagu magacaabaa Cabdiraxmaan Xuseen Xasan (Gaardi), halka wariyaha kale oo lagu magacaabo Jamaal Faarax Aadan uu ahaa wariye ka tirsan idaacadda Daljir, mana jirto faah faahin rasmi ah oo laga hayo xarigga labadaas wariye.

Haddaba waxaa xarigga wariyaasha cambaareeyey Ururka suxufiyiinta Puntland ee magaciisa loosoo gaabiyo MAP, kadib shir deg deg ah oo wariyaashu ay ku yeesheen xarunta idaacadda Daljir ee magaalada Garoowe, ugu horreyn waxaa halkaas ka hadlay guddoomiyaha ururka MAP Faysal khaliif Barre.

“Ururka saxafiyiinta Puntland wuxuu si adag u cambaareynayaa xarigga saakay lagu xiray magaalada  Garoowe Cabdiraxmaan Xuseen Xasan iyo Jamaal Faarax Aadan oo labaduba ka tirsan idaacadda Daljir, ilaa iyo haddana ma garanayno sabab loo xiray, waxaan u aragnaa xarigaasi inuu yahay xarig xad-gudub ku ah saxaafadda, sidoo kalena xad gudub ku ah sharciga iyo qawaaniinta Puntland, sidoo kalena xad-gudub ku ah xoriyadda uu dastuurka Puntland siinayo saxaafadda, waxaana maamulka Puntland ugu baaqaynaa inay si shuruud la’aan ah kusoo daayaan suxufiyiintaas oo ilaahadda aanan garanayn sababta ay u xiranyihiin”

Agaasimaha Guud ee idaacadda Daljir Axmed Sheekh Maxamed (Tallman) ayaa isna halkaas ka hadlay, wuxuuna cambaareyn dusha uga tuuray xarigga loo geystay labadaas wariye

“Waxaan is leeyahay waxaa loo xiray waxay tahay maxaa dadku u hadlayaan, maxaa dowladda loo dhaliilayaa, maxay  dadku u odorosayaan, waxa uu maamulku qabtay ama uu qabanwaayey, taasna waxay xad-gudub ku tahay xoriyadda saxaafadda” ayuu yiri Agaasimaha guud ee Idaacadda Daljir.

Ilaa iyo hada maamulka Puntland wax war ah kama soo saarin xarigga labada wariye ee saakay lagu xiray saldhiga koontaroolka koonfure ee magaalada Garoowe.

 

Cabbdi  Xasan Awoowe

 

 

Did you like this? Share it:

LEAVE A REPLY

Please enter your comment!
Please enter your name here