Golaha Wasiirada oo yeeshay shir lagu qiimeynayo waxqabadka lixdii bil ee la soo dhaafay

1266

Shirkan oo ahaa mid aan caadi aheyn ayuu Ra’iisul wasaaraha Xukuumadda Federaalka Mudane Cumar Cabdirashiid Cali isugu yeeray dhammaan xubaha golaha wasiirada, isla markaana uu shir guddoominayey kulanka,  iyadoo uu joogay ku-xigeenka Ra’iisul wasaaraha, waxaana shirka si gaar ah diiradda loogu saaray waxqabadka Xukuumadda hadda jirta mudada ay shaqeyneyso.

Wasiirka Warfaafinta, Dhaqanka iyo Dalxiiska  Xukuumadda Federaalka Soomaaliya, Mudane Maxamed Cabdi Xayir (Maareeye), ayaa warbaahinta Qaranka u sheegay  muhiimadda guud ee shirka golaha Wasiirrada, isagoo carrabka ku dhuftay in Ra’iisul wasaaraha iyo ku-xigeenkiisa in wasaarad walba waxqabadkeeda la qiimeeyey, isla markaana  uu jiro isla xisaabtan adag oo ku saleysan maamul wanaag.

Dhinaca kale Wasiirka Warfaafinta, Dhaqanka iyo Dalxiiska  Xukuumadda Federaalka Soomaaliya, Mudane Maxamed Cabdi Xayir (Maareeye), ayaa tilmaamay in golaha wasiirrada ay dood kulul ka yeesheen arrimaha ammaanka Qaranka  gaar ahaan sidii loo soo gabagabeyn lahaa howlgallada ka dhanka ah nabad-diidka, qorshe arrintaa la xiriirana dhowaan laga fulin doono meelo  qorsheysan.

Wasiirka Warfaafinta Xukuumadda Soomaaliya, ayaa sheegay in aragti ay Puntland ka bixisay dhismaha maamulka Galmudug in  ay xalin doonaan hey’ado Destuuri ah dowladda Federaalkuna ay diyaar u tahay  in hanaan siyaasad xasiloon leh in ay ku dhammeyso arrimahaasi.

Xukuumadda Federaalka ayaa jirsatay muddo Lix-bilood la badan, waxaana weli socda olollaha  cusub ee lagu qiimeynayo wasaaradaha dowladda, si loo kala ogaado hey’adda aan ka soo bixin maruudaha ay u xilsaaran tahay, waana hanaan hufan oo muujinaya biseylka laga gaaray isla xisaabtanka inkastoo ay jiraan hey’adaha aan  qaban ugu badnaan shaqooyinkii loo diray.

 

Did you like this? Share it:

LEAVE A REPLY

Please enter your comment!
Please enter your name here