Golaha Wasiirrada Xukuumadda Federaalka Soomaaliya oo Ansixiyay Hindise sharciyeedka Fasaxa dhismaha “SAWIRRO”

Ra’iisul Wasaare ku-xigeenka dalka Mudane Mahdi Maxamed Guuleed ayaa  guddoomiyay shirka toddobaadlaha ah ee Golaha Wasiirrada Xukuumadda Federaalka Soomaaliya oo  lagu ansixiyay hindise sharciyeedka Fasaxa dhismaha iyo magacaabista xubin ka bannaaneyd Guddiga  dib-u-eegista dastuurka oo loo magacaabay  Mudane Daahir Xasan Cabdi.

Golaha Wasiiradda Xukuumadda Federaalka Soomaaliya  ayaa ansaxiyay Hindise-Sharciyeedka Fasaxa Dhismaha Soomaaliya oo uu horgeeyay Wasiirka Wasaaradda Hawlaha Guud, Dib-u-dhiska iyo Guriyeynta Xukuumadda Federaalka Soomaaliya Mudane Maxamed Adaan Macalin (Soomaali).

Ujeedada Hindise- Sharciyeedka Fasaxa Dhismaha:

Wasaaradda Howlaha Guud, Iyadoo  gudaneysa waajibkeeda shaqo ee kaga aaddan Xukuumadda Federaalka Soomaaliya, waxay ku talaabsatay sidii loo diyaarin lahaa Sharci Fasaxa dhismo loo dhan yahay.

Ujedkeed kiisuna yahay:

a) Maareynta dhismooyinka si loo ilaaliyo Caafimaadka iyo badqabka
dadweynaha.

b) Dejinta Siyaasadda hanaan sharciyeed lagu mideenayo sharciga dhismooyinka
Jamhuuriyadda Federaalka Soomaaliya.

c) Dejinta halbeegyo lagu yareynayo khataraha dhismooyinka ka imaan kara, sida liidasho farsamo, agabyada dhisamaha ee aan wanaagsaneyn, dumid dhismo, wax-yeeleyn noolol maalmeedka dadweynaha, fogeynta qashinka, iyo khataraha daadadka iyo nabaad guurka Carrada.

d) Dejinta hanaanka bixinta fasaxa dhismaha oo ay ku jiraan adeegsiga qaabab casri ah, sida e-permit.

e) Dhiiragalinta maalgashiga gudaha iyo midka shisheeye ee dhismooyinka kaas u hoggaansan shuruucda, xeer nidaamiyaasha iyo halbeegyada quseeya arrimaha qorsheynta, ka faa’iideysiga dhulka iyo deegaanka.

f) Hirgelinta nidaam mideysan oo lagu maareynayo dhismooyinka dalka iyo bixinta ruqsadaha fasaxa dhismaha.

g) Horumarinta dhismooyin wax tar u leh dadka iyo deegaanka.

h) Ilaalinta iyo tixgalinta dadka baahyaha gaar ah qaba ee habka dhismaha.

(i) La qabsiga isbedelada Cimilada adduunka qaababka dhismooyinka.

(j) Ilaalinta dhismooyinka taariikhiga ah.

Faa’idada Hindise – sharciyeedka  Fasaxa Dhismaha:

1′ Siyaasadaan waxay wax weyn ka badalaysaa baahida habraaca iyo fasaxa dhismo ee dalka ka jira, waxay tayeynaysaa adeegyada bulsho mid dhaqaale iyo waxqabadka Xukuumadda heerar keeda iyo laamaheeda kala duwan ee u kala baxan:

a. Heer Federaal,
b. Heer Dowlad Goboleed
c. Heer Dowlad Hoose

2′ Hindisahaan sharci waxa uu nidaaminayaa habraacyada iyo fasaxa dhismo ee farsamo ahaan loo baahan yahay iyo heerka darajo maamul ee uu dalka u bahaan yahay.