Guddiga Amniga ee Golaha Shacabka oo ka hadlay doorka Golaha ee la xisaabtanka hay’adaha Nabadgelyada “SAWIRRO”

Guddiga amniga iyo Arrimaha Gudaha ee Golaha shacabka ayaa ka hadlay doorka Golaha ee ku aadan la xisaabtanka Hay’adaha Amniga, iyagoo soo jeediyay talooyin ku aadan sida lagu xoojin karo xagga amniga kaddib markii mas’uuliyiin ka tirsan guddiga ay maanta ka qeyb galeen barnaamijka Kulanka Todobaadka ee ka baxa Warbaahinta Qaranka Jimcaha.

Guddoomiye ku-xigeenka Guddiga Amniga iyo Arrimaha Gudaha ee Golaha Shacabka ahna Ku-simaha Guddoomiyaha Xildhibaan Maxamed Cabdulle Faarax Geesey iyo Xildhibaan Axmed Ismcaaciil oo xubin ka ah guddiga ayaa si wada jir ah u faah faahiyay doorka guddiga, waxaana ay shacabka ku booriyeen inay muujiyaan kaalintooda kaga aadan la shaqeynta laamaha amniga.

Xildhibaan Maxamed Cabdulle Faarax Geesey ayaa ugu horeyn bogaadiyay guulaha laga gaaray Dacwadda Soomaaliya ee dhanka badda, dib u xoreynta deegaannada ku suganyihiin argagixisada Al-Shabaab iyo dadaallada ay xukuumadda Soomaaliya ugu jirto arrimaha dib u heshiisiinta.

Guddoomiye ku-xigeenka Guddiga amniga iyo Arrimaha Gudaha ee Golaha Shacabka Xildhibaan Maxamed Cabdulle Faarax Geesey ayaa xusay inay kormeer ku sameeyaan hanaanka ay u socdaan amniga, isagoo intaa raaciyay in howlaha kormeerka kaddib ay kulamo la qaataan saraakiisha ay quseyso.

Xildhibaan Axmed Ismaaciil oo xubin ka ah Guddiga Amniga iyo Arrimaha Gudaha ee Golaha Shacabka ayaa sheegay in Xukuumadda ay xagga amniga wax badan ka qabatay, balse loo baahanyahay in shacabku ay door muhiim ah ka qaataan, maadaama cadowga shacabkeena waxyeeleynayo uusan ahayn mid dibadda ka yimaada.

Xildhibaan Axmed ayaa yiri “Labo sifo ayaa lagu soo afjari karaa dhibaatada xagga amniga, mid in loo wajaho ciidan oo sida hadda la sameeyo ah, midna in heshiis lala galo oo wada hadal wax lagu dhameeyo.”

Xildibaan Geeseey ayaa mar uu ka hadlayay saameynta ay keeneyso isku shaan dheynta lagu sameynayo laamaha amniga ayaa yiri “Isdhaaf dhaafka Taliyeyaaha ayay ka yimaadaan qaladka xaga nabadgelyada, waayo cadowga waxa uu ka faa’iideysanaya isbadalka lagu sameynayo taliyeyaasha amniga, ka hor inta uusan taliyaha cusub la qabsan howsha loo idmaday, waxaana ku talinaynaa in dadka aqoonta u leh amniga la laasimo oo aan war wareeg la gelinin”.

“Waxaan soo jeedineynaa in laamaha Amniga ay kalsooni dhaw la yeeshaan shacabka, bulshadana ay hay’adaha amniga gacan ku siiyaan sidii looga hortegi lahaa waxkasta oo Nabadgelyada wax u dhimaya”. ayuu Xildhibaan Axmed Ismaaciil.

Qaar ka mid ah dadkii qadka telefoonka kaga qeyb qaatay barnaamijka ayaa su’aalo dhowr ah weydiiyay guddiga, waxaana ay uga jawaabeen si waafi ah.

Xildhibaan Axmed mar uu ka jawaabayay mid ka mid ah su’aalaha la weydiiyay ayaa yiri “Qofka xogta gudbinaya marka hore waa in uu ahaadaa qof ku kalsoon cidda uu xogta la wadaagayo, waana in uu iska hubiyaa xogta run ahaan shaheeda, tankale laamaha amniguna waa inay si dhaqsi leh uga jawaab celiyaan xogta la soo gaarsiiyo” ayuu yiri Xildhibaan Axmed Ismaaciil.

 

LEAVE A REPLY

Please enter your comment!
Please enter your name here