Guddiga Hirgelinta Doorashada Galmudug oo shaaciyay xilliga la qabanaayo doorashada Aqalka Sare

Guddiga Hirgelinta Doorashada heer dowlad Goboleed ee Galmudug ayaa soo saaray Jadwalka doorashada Aqalka sare ee uu xalay  shaaciyay Madaxweynaha Dowlad gobaleedka Galmudug  Axmed Cabdi Kaariye.

Qoraal kasoo baxay Guddiga ayaa waxaa lagu sheegay in doorashada Xildhibaanada Aqalka sare ay dhici doonto maalinta Khamiista ee ku beegan, 12-ka  August 2021.

Sidoo kale Guddiga ayaa sheegay in Maanta  la diiwangelin doono Musharixiinta u taagan qabashada kuraasta Aqalka Sare ee laga soo doorta Galmudug si Maalinta beri ah ay doorashada u dhacdo.

Doorashada Xildhibaannada Aqalka sare ayaa haatan u muuqata mid si dardar leh ku socota,  waxaana manta la filayaa in Guddiga Hirgelinta Doorashada heer dowlad Goboleed ee Puntland ay qabtaan doorashada 11-ka  Xubnood  ee  u tartamaya qabashada  Kuraasta Aqalka sare.