Guddoomiyaha Dhuusamareeb oo booqday qoys hooygooda uu dab baabi’iyay

Guddoomiyaha magaalada Dhuusamareeb ahna Duqa Caasimadda Galmudug mudane Cabdiraxmaan Cali Maxamed “Geedaqorow” ayaa maanta booqasho ugu tagay qoys danyara oo dhawaan hoygii ay daganaayeen dab baabi’iyay.

Guddoomiyaha oo ay wehliyeen guddoomiyaha xaafadda Dayax Axmedsiciid Maxamed Suudi iyo Ganacsade Nuur Xiirane ayaa qoyska la qaybsaday dhibkii soo gaaray inay ka xunyihiin, una kuurgalay khasaaraha hantiyeed ee qoyska gaaray, si loogu sameeyo caawin bulshadana loogu bandhigo taakulaynta iyo garab istaaga baahida qoyskani wajahayo.

Guddoomiye Geedaqorow ayaa qoyska u sheegay in loo dhisayo guryihii uu dabku baabi’iyay, maamulkuna uu dhisayo isagoo kaashanaya ganacsatada iyo bulshada magaalada Dhuusamareeb.

Sidoo kale Ganacsade Nuur Xiirane iyo guddoomiyaha xaafadda Dayax Axmedsiciid Maxaamed Suudi ayaa sidoo kale sheegay inay qayb ka qaadanayaan dib u dhiska guryahooda iyo nolosha kale ee qoyska.

Ugu dambayn Aabaha qoyska gurigoodu baaba’ay ayaa ka mahadceliyay booqashada guddoomiyaha iyo guddiga xaafadda iyo balan qaadka ay sameeyeen ee ay guriga ugu dhisayaan.