Guddoomiyaha gobolka Benaadir oo sheegay in dib loo furayo wadooyinka xiran

1942

Guddoomiyaha Gobolka Banaadir ahna Duqa magaalada Muqdisho Taabit Cabdi Maxamed ayaa sheegay in uu socdo qorshe la xiriira in dib loo furayo wadooyinka xiran ee Muqdisho oo ay ka mid tahay wadada ka timaada Tarabuunka iyo weliba jidcadayaasha kale ee xiran, waxaana uu intaa ku daray inay jiraan qorshayaal ku aadan sida uu maamulka Gobolka Banaadir ka yeelayo gaadiidka waaweyn ee dhex mara magaalada.

Guddoomiyaha oo ka qeyb galay barnaamijka kulanka todobaadka ee ka baxa Radio Muqdisho iyo Telefishinka Qaranka ayuu ku sheegay in ay wadaan qorshe ku aadan sidii dib la isugu furi lahaa waddooyinka qaar ee xiran magaalada.

“Wadooyinka sababta loo xirey waa  arrimo amni, balse mar walba waxa uu maamulka Gobolka ka shaqeynayaan danaha shacabka ay u shaqeeyaan.”ayuu yiri Duqa magaalada Muqdisho.

Mar uu Guddoomiyaha ka hadlayay gawaarida xamuulka qaada ayuu sheegay Guddoomiye Taabit inay ku qorsheynayaan in waddo kaliya loo yeelo gawaarida xamuulka qaada, taasoo ay haatan wada qorsheynayaan iskaashatooyinka gaadiidka iyo weliba ciidamada taraafikada.

Guddoomiye Taabit ayaa tilmaamay in aysan suuragal aheyn in dekadda ay qaabisho gawaari badan, sidaasi darteedan gaadiidka Xamuulka waqtiyo gaar ah ay shaqeyn doonaan si ciriiri aysan ugu keenin wadooyinka kale ee Muqdisho.

Waddooyinka waaweyn ee magaalada Muqdisho ayaa haatan noqday ciriiri kadib markii wadooyin jid cadayaal oo muhiim u ahaa isu socodka dadka iyo gaadiidka la xirey, waxayna taasi qasabtay in gaadiidka oo idil ay laamiyada maraan, taasoo xilliyada qaar gaadiidku aysan helin meel ay kala maraan.

Did you like this? Share it:

LEAVE A REPLY

Please enter your comment!
Please enter your name here