Guddoomiyaha gobolka Hiiraan oo ka waramay xaaladda Beledweyn

2008

Guddoomiyaha maamulka gobolka Hiiraan, mudane Yuusuf Axmed Hagar, oo shir saxaafadeed ku qabtay magaalada Muqdisho waxa uu muujiyey fatahaadaha iyo dagaalada isbiirsaday ee ka jira magaalada Baladweyne ee xarunta u ah gobolka Hiiraan sida ay u saameeyeen nolosha dadka iyo jawiga magaalada oo hada u muuqata mid sii xumaaneysa.

Gudoomiyuhu waxa uu sheegay in hada Bulshada Baladweyne ay la daalaa dhacayaan sidii ay uga kabsan lahaayeen fatahaadaha magaalada oo saameeyey nolosha dadka, xoolaha, iyo ganacsiga magaalada oo hada xayiran.

“Bulshadu dhibaato weyn ayey ku jiraan runtii xoolaha dadka iyo ganacsiga wey adag tahay sababtoo ah fatahaado badan ayaa jira, wax dhaq dhaqaaq ah hada ma jiro,” ayuu yiri Hagar.

Dowlada Soomaaliya iyo bulshada caalamka ayuu u jeediyey gudoomiyaha gobolka Hiiraana mudane Yuusuf Axmed Hagar, in door muuqda ay ka qaataan wax u qabashada shacabka re baladweyne, isaga oo dhinaca kale muujiyey dhaliil ay u qabaan madaxda dalka.

“Waxaan codsaneynaa dowlada iyo caalamka in ay wax nala qabtaan oo gurmad ay sameeyaan, runtii aniga wali ma arkin madaxda dowlada oo kahadlaya dhibaatada baladweyne,” ayuu marka kale sheegay guddoomiye Hagar.

Ugu dambeyn dagaalada kajira magaalada oo uu soo hadal qaaday gudoomiyaha gobolka Hiiraan waxa uu sheegay in soo noq noqshadooda ay sabab u tahay iyada oo mar waliba aan la xalin caqabada dhabta ah ee dagaalada sababa.

“Dagaalada waxaa soo celceliya in aan la hir galin heshiisyada la sameeyo iyo waxa rasmiga ah ee mar walba dagaalada dhaliya waana taas mid dadka dagaalamaya ay gocdaan,” ayuu hadalkiisa ku daray Hagar.

Did you like this? Share it:

LEAVE A REPLY

Please enter your comment!
Please enter your name here