Guddoomiyaha Golaha shacabka oo loo doortay Xildhibaan Maxamed Mursal Sheekh Cabdiraxmaan

1112

Mudanayaasha Golaha Shacabka ayaa guddoomiye Baarlamaan u doortay Xildhibaan Maxamed Mursal Sheekh Cabdiraxaan kadib markii wareegga labaad ay ku tartameen Xildhibaan Ibraahim Isaaq Yarrow.

Xildhibaan Maxamed Mursal Sheekh Cabdiraxmaan ayaa helay codad dhan 147, iyadoo Xildhibaan Ibraahim Isaaq Yarrow uu isna helay codad dhan 118, waxaana Guddoomiye ku-xigeenka koowaad ee Baarlamaanka Xildhibaan Cabdiweli Sheekh Ibraahim Muudeey uu ku dhawaaqay in kurgisii Guddoomiyaha Golaha Shacabka uu ku guuleystay Xildhibaan Maxamed Mursal Sheekh Cabdiraxmaan.

“Waxaa codeysay 265 Mudane, Xildhibaan Ibraahim Isaaq Yarrow waxa uu helay 118, cod, halka Xildhibaan Maxamed Mursal Sheekh Cabdiraxmaan uu helay 147, waxaa ku guuleystay kursiga Guddoomiyaha Golaha Shacabka Mudane Maxamed Mursal Sheekh Cabdiraxmaan” ayuu yiri Guddoomiye Muudeey.

Xildhibaan Ibraahim Isaaq Yarrow oo khudbad ka jeediyay ayaa ugu hambalyeeyay guddoomiyaha cusub ee Golaha Shacabka sida uu ugu guuleystay kursiga, waxaana uu Mudanayaasha uga mahadceliyay sida huftaanta leh ee ay ku dhacday doorashada.

Xildhibaanka ayaa balan qaaday in uu la shaqeyn doono Guddoomiyaha Baarlamaanka.

Guddoomiyaha Golaha Shacabka Maxamed Mursal Sheekh Cabdiraxmaan ayaa dhamaan Xildhibaannada doortay iyo kuwa aan dooran u mahadceliyay, isagoo xusay in uu si dhaw ula shaqeyn doono dhamaaan Xildhibaannada Golaha Shacbaka.

“Waxaan hortiina ku balan qaadayaa inaan ilaalin doono sharciga oo aan kursigan ugu shaqeyn doono Danta, Dalka, Diinta iyo Dadka, kuna dhaqmi doono dastuurka dalka” ayuu yiri Guddoomiyaha Golaha Shacabka.

Doorashada Baarlamaanka oo ay ku tartameen 11 musharax ayaa wareeggii koowaad waxaa ka soo gudbay ilaa iyo Afar musharax kuwaasi oo kala ahaa Xildhibaan Maxamed Mursal Sheekh Cabdiraxmaan oo helay 83-cod, Xildhibaan Ibraahim Isaaq Yarow oo helay 69-cod, Xildhibaan Cabdicasiis Xasan Maxamed Laftagareen 54-cod iyo Xildhibaan Shariif Maxamed Abdalla oo isna helay 19-cod.

Did you like this? Share it:

LEAVE A REPLY

Please enter your comment!
Please enter your name here