Guddoomiyaha Guddiga Farsamada Ka Baaraan Degidda Tallooyinka La Xiriira Hannaanka Doorashada Oo Ka Hadlay Warbixinta Ay Madaxda Siiyeen

Guddoomiyaha Guddiga Farsamada ka baaraan degidda tallooyinka la xiriira Hannaanka doorashada ahna sii hayaha Wasiirka Dastuurka ee Xukuumadda Soomaaliya mudane Saalax Axmed Jaamac oo shir jaraa’id qabtay ayaa sheegay in Madaxda ka qeyb galeysa Shirka Dhuusamareeb 3 ay maalmaha soo socda go’aamo ka gaarayaan, ayna isla meel dhigi doonaan hannaan doorasho oo suurta gal ah iyo habka ugu habboon ee dooorasho lagu geli karo.

Wasiir Saalax ayaa tilmaamay in Madaxda ka qeyb galaysa shirka ay uga warbixiyeen shaqooyinkii ay soo qabteen, halka wax u marayaan, lana wadaageen xulashooyinka doorasho lagu geli karo, isagoo xusay in Dhuusamareeb loogu fadhiyo shirkii 22-ka bishii July loogu balamay.

Guddoomiyaha Guddiga Farsamada ka baaraan degidda tallooyinka la xiriira Hannaanka doorashada oo ugu horeyn ka hadlayay waxyaabihii u qabsoomay intii ay Muqdisho joogeen ayaa yiri “Waxaan si horu dhac ula tashanay hogaanka bulshada, sida xisbiyada inta aan ka gaareynay, ururada bulshada, guddiga Madaxa banaan ee doorashooyinka Qaranka, kulamadaas waxa ay ahaayeen kulamo wada tashiyo ah oo dadka arrimaha daneynaya looga soo aruurineyay afkaarahooda, waxaa kaloo xusid mudan in Madaxda Maamul Goboleedyada qaarkooda ay nagu soo booqdeen xarunteena Muqdisho oo ay nagu baraarujiyeen howsha aan heyno”

Siihayaha Wasiirka Dastuurka ee Xukuumadda Soomaaliya mudane Saalax Axmed Jaamac ayaa sheegay bulshada Soomaaliyeed looga baahanyahay inay ka warsugaan Madaxdooda shirka wadatashiga ah uga socda Dhuusamareeb.

“Waxaa lagu rajo weynyahay dhawaan in madaxdu marka ay arrimahaan ka baaraan degto ay isla meel dhigto hannaan doorasho oo suurta gal ah, xeeriyana hiigsiga iyo himilada dadka Soomaaliyeed, anagu wax badan wey noo soo qabsoomeen, waxna wey dhimanyihiin, oo waxa ay ku imaaneysaa is afgarad iyo wada xaajood siyaasadeed oo ah kan maanta halkan loo fadhiyo sida ay madaxdu ku balantay 22-kabishii July”, ayuu yiri Wasiir Saalax

LEAVE A REPLY

Please enter your comment!
Please enter your name here