Guddoomiyaha guddiga shaqaalaha dowladda oo ka hadlay tirakoobka shaqaalaha

775

Iyadoo dhawaan, dowlada Soomaaliya ay sameysay Tirakoob lagu ogaanayey tirada iyo tayada shaqaalaha rayidka ee dowladda, ayaa guddoomiyaha guddiga shaqaalaha rayidka Soomaaliyed Mudane Xasan Abshirow Maxamed, waxa uu in sheegay in dhowaan la soo bandhigi doono natiijada tirakoobkaas.

Mudane Abshirow, oo wareysi gaar ah xafiiskiisa ku siiyey warbaahinta qaranka ayaa  ka hadlay arrimo badan oo ku saabsan waxyaabaha uu qabto guddiga shaqaalaha rayidka, waajiibaadkiisa, tirada shaqaalaha rayidka, rag iyo dumar waxay kala yihiin xuquuqahooda.

Mar uu ka hadlayey natiijada ka soo baxday tirakoobkaas waxa uu sheegay in laga diyaariyey qabyo qoraal dhawaanna la soo bandhigi doonno.

“Tirakoobkii la sameeyey waxaa hormuud ka aheyd wasaarada shaqada iyo shaqaalaha ee dowlada Soomaaliya, anagana qeyb ayeynu ka aheyn, kaligeenna ma aheyne, hay’addo badan oo ay kamid ahaayeen; xafiiska hanta dhowrka, iyo xafiisyada xisaabaha guud iyo kan ra’isalwasaaraha,” ayuu yiri gudoomiye Abshirow.

Mar uu ka hadlayey xuquuqaadka shaqaalaha rayidka waxa uu sheegay in inkastoo duruufo dhaqaalo yari ay  wadanka ay ka jirto, taasina keentay qaar shaqaalaha ka mid ah xuquuqdii u baahnaayeen aysan helin sidaa awgeedna dowladdu ku dedaaleyso xaqiijinta arrintaas.

“Shaqaalah rayidka 100% ma  helaan xuquuqaadka loo baahnaa taasina waxaa keenaya duruufaha dhaqaala yari ee  wadanka ka jita  inkastoo haatan dib u soo kabasho lagu jiro,” ayuu yiri Gudoomiye Xasan Abshiro Maxamed.

Mar aan weydiinay guddoomiyaha sharci ahaanshaha shaqaalaha rayidka ah ee ka mid noqoshada  xisbiyada siyaasadeed ee dalka waxa uu sheegay in shaqaalaha rayidka, ciidamada iyo guddiyada Madax bannaanba  aysan ka qeybgali karin kana mid noqon karin xisbiyada siyaasadeed ee jira, isagoo taas ku sababeeyey in shaqaalaha rayidka ay ka shaqeynayaan dan guud ah oo dad loo qabanayo, haddiise ay xisbi galaan ay noqoneyso mid dhinac ah oo danaha xisbigaas un ka shaqqeynaya.

Gudoomiyaha Guddiga shaqaalaha Rayidka, Mudane Xasan Abshirow Maxamed, oo aan weydiinay in sanadka soo socda ee 2019-ka la qaadanayo shaqaale rayid ah waxa uu sheegay in baahida qaadashada shaqaalaha aysan ka imaan guddiga, laakiin ay ka timaado hay’adaha kale ee  dowlada, taasina ay ku xiran tahay hadba sidii dhaqaale iyo miisaaniyad loogu soo helo dadka cusub ee la qaadanayo.

Guddiga Shaqaalaha Rayidka, ayaa waxa ay shaqadiisa tahay qorida, diiwaangalinta, dallacsiinta, Rukhseynta  iyo Abaalmarinta dhammaan shaqaalaha rayid ee dowladda, waxaana lagu ansixiyey xeer Golaha wasiirada soo maray, Golaha shacabka ay ansixiyeen iyadoo Madaxweynaha uu xeer ku soo saaray.

 

Did you like this? Share it:

LEAVE A REPLY

Please enter your comment!
Please enter your name here