Guddoomiye Jawaari oo kulan sagootin ah u sameeyay arday ka tirsan Jaamacadda SIU “SAWIRRO”

Guddoomiyaha Baarlamaanka Federaalka ah ee Soomaaliya Mudane Maxamed Sheekh Cismaan Jawaari ayaa maanta kulan sagootin ah u sameeyay qaar ka mid ah ardayda Jaamacadda SIU, gaar ahaan kuwa dhigta kuliyadda caafimaadka ee Jaamacadda.

Kulanka sagootinta iyo dhiirigelinta ee uu Guddoomiye Jawaari u sameeyay ardayda Jaamacadda SIU, ayaa waxaa ka qeyb galay xubno ka tirsan baarlamaanka Federaalka ah ee Soomaaliya, Hormuudka Jaamacadda SIU Prof Yaxye Cali Ibraahim iyo mas’uuliyiin kale oo munaasabadda lagu casuumay.

Tirada ardayda oo gaareysa lixdan iyo shan arday oo wax ka barata Kuliyadda Caafimaadka ee Jaamacadda SIU ayaa waxa ay hal sano oo qeyb ka ah waxbarashadooda heerka Jaamacadeed ay ku soo qaadan doonaan Shan Jaamacadood oo ku kala yaalla Wadamada Kenya, Uganda iyo Sudan, si ay u soo qaataan aqoon kororsi la xiriirta dhameystirka heerka koowaad ee Jaamacadda.

Hormuudka Jaamacadda SIU Prof Yaxye Cali Ibraahim oo kulanka hadal kooban ka jeediyay ayaa sheegay in tani ay qeyb ka tahay heshiis xagga waxbarashada ah oo ay la galeen Madaxda Shantaasi Jaamacadood, si loo kobciyo aqoonta ardayda wax ka barata Jaamacadda, gaar ahaan kuwa dhigta kuliyadda caafimaadka.

“Ardaydan tiradoodu waa 65 arday, 26 ka mid ah sanadkii la soo dhaafay ayaan Uganda u dirnay, hadana Kenya ayaan markale u direynaa qaarkood, halka kuwa kawa kale aan u direyno University of Nairobi ee dalka Kenya, Jaamacadaha Makerere, Gulu, Mbarara ee Wadanka Uganda iyo Jaamacadda Ommu Durman University ee dalka Sudan, kuwaasi oo aan la soo galnay heshiis xagga isdhaafsiga ardayda iyo in ay ardayda ka caawiyaan goobaha caafimaadka oo ay adeegyadooda u dhameystiranyihiin wax lagu baro, runtii 41 ka mid ah sanadka ugu dambeeya ee Jaamacadda ayay ku jiraan, ardaydan nasiib ayay u heleen inay ka faa’iideystaan fursadda ay Jaamacadda SIU siisay” ayuu yiri Prof Yaxye Cali Ibraahim

Guddoomiyaha Baarlamaanka Soomaaliya Mudane Maxamed Sheekh Cismaan Jawaari oo hadalo dar daaran ah u jeediyay ardayda ayaa tilmaamay in ay tahay wax lagu farxo in arday Soomaaliyeed oo heer Jaamacadeed ah ay waxbarasho ku saabsan dhameystirka heerkooda Jaamacadeed ay ku soo qaataan Jaamacado xiriir la leh Jaamacadda ay dhigtaan ee dalka dibadiisa, si ay u noqdaan dhaqaatiirtii dalka wax u qaban lahayd.

“Waan u mahadcelineynaa Jaamacadaha is xilqaamay ee jecleystay in ardayda Soomaaliyeed ay wax baraan, Jaamacadda SIU iyana waan uga mahadcelineynaa dadaalka ay arrintan ku bixisay, waxaan idinkula dar daarmayaa in aad noqotaan dad wax u soo barta dalka, waxyaabaha la diyaarinayo ee la doonayo inay wax noqdaan waa idinka, dalkan idinku ayuu idin sugayaa ee ku dadaalla dhismihiisa iyo horumarintiisa” ayuu yiri Prof Jawaari.

Kulanka kaddib qaarka mid ah ardayda loo dirayo shanta Jaamacadood ee dalka dibadiisa ah ayaa tilmaamay inay aad ugu faraxsanyihiin fursadda ay Maamulka Jaamacadda siisay.

Waa sanadkii labaad ee Madaxda Jaamacadda SIU ay ardayda dhigata kuliyadda caafimaadka u diraan dalka dibadiisa, si ay halkaasi ugu soo dhameystirtaan semestarada ka haray heerka koowaad ee Jaamacadda, taasi oo ah astaan muujineysa horumarka waxbarasho ee ka jirta dalka.

vlcsnap-2015-07-22-16h33m04s32 vlcsnap-2015-07-22-16h33m31s35 vlcsnap-2015-07-22-16h33m46s201 vlcsnap-2015-07-22-16h34m17s244 vlcsnap-2015-07-22-16h34m36s217 vlcsnap-2015-07-22-16h35m03s233 vlcsnap-2015-07-22-16h35m09s33 vlcsnap-2015-07-22-16h35m51s148 vlcsnap-2015-07-22-16h36m01s9 vlcsnap-2015-07-22-16h36m11s104 vlcsnap-2015-07-22-16h36m44s142 wwee wweerr wwwvlcsnap-2015-07-22-16h37m15s184 vlcsnap-2015-07-22-16h37m39s165 vlcsnap-2015-07-22-16h37m51s84 vlcsnap-2015-07-22-16h38m02s206 vlcsnap-2015-07-22-16h38m34s251

LEAVE A REPLY

Please enter your comment!
Please enter your name here