Guddoomiye Tuulax oo xalay kormeeray hanaanka suggida Ammaanka Degmada Wadajir “SAWIRRO”

Guddoomiye Ku-xigeenka dhanka ammaanka iyo Siyaasadda Maamulka Gobolka Banaadir Maxamed Cabdullaahi Tuulax ayaa xalay kormeer ku sameeyay hanaanka loo suggo ammaanka Degmada Wadajir.

 

Guddoomiye Tuulax oo uu wehliyo Guddoomiyaha Degmada Wadajir Cumar Cabdulaahi Xasan iyo Taliyaha Qaybta Galbeed ee Ciidanka Booliska Somaliya Yuusuf Xundubey, ayaa u kuurgalay Afarta Waaxood ee ay ka kooban tahay Degmada Wadajir.

Mas’uuliyiintaan ayaa socod lug ah ku maray dhamaan Afarta Waaxood ee Degmada Wadajir, halkaasi oo ay ku soo arkeen Ciidamada ammaanka oo shaqeynaya, islamarkaana ku jira xaaladda suggida ammaanka shacabka Degmadaasi.

Guddoomiyaha ayaa Ciidanka ku dhiirageliyay inay sii laba jibaaraan masuuliyadda ka saaran suggida ammaanka, si shacabka Somaliyed ee Degmadaasi ku nool nabad ay ugu seexdaan uguna soo toosaan.

Guddoomiye Tuulax ayaa sheegay Kormeerka suggida ammaanka Degmooyinka inuu yahay mid joogto ah oo loogu kuur galaayo, xilliyada habeenkii iyo maalintii sida ay u shaqeeyaan Ciidanka amniga ee Degmooyinka Muqdisho ka hawlgala.

“Waxaan kormeer ku tagnay qeybaha kala duwan ee Degmada Wadajir gaar ahaan Saldhiga iyo 4-ta Waax ee Degmada halkaas oo ay ku sugan yihiin ciidamo ka hawlgalaya waax walba, waxaana socod ku marnay 4ta waax ee degmada wadajir.”

“Kormeerkaan ayaa ah mid joogto ah oo aan ku sameyn doono laamaha kala duwan ee amniga xiliyada maalinkii iyo habeenkii si aan u hubino shaqada iyo wada shaqaynta dhaxdooda ah.” Ayuu hadalkiisa sii raaciyay Gudoomiye Tuulax.

Ciidanka amniga ee ka hawlgala Degmooyinka Gobolka Banaadir, ayaa habeen & maalin u taagan suggida ammaanka Degmooyinka iyo ka hortagga falalka guracan ee Kooxaha  Nabaddiidka ay soo maleegaan.

–DHAMAAD–

Did you like this? Share it:

LEAVE A REPLY

Please enter your comment!
Please enter your name here