Guulaha Soomaaliya ay ka gaartay hufnaanta Maaliyadda oo la soo bandhigay

2176

Guulihii Soomaliya ay ka ka gaartay Hufnaanta Maaliyadda, isla xisaabta iyo kor qaadiida daqliga gudaha si looga cafiyo deymaha balaayiinta doler ah ee Hey’adda lacagta aduunka ku leedahay Soomaaliya ayaa lagu soo bandhigay, waxaana xafladaan ka qeyb galay Raisul wasaaraha dalka, Wasiiro, Xildhibaanno, Guddoomiyaha Bankiga dhexe, marti sharaf iyo mas’uuliyiin kale waxaana soo qaban qaabisay Wasaaradda Maaliyadda Soomaaliya.

Gudoomiyaha Bangiga Dhexe ee Qaranka  Bashiir Ciise Cali ayaa sheegay in Wasaaradda Maaliyadda Soomaaliya ay Hirgalisay nidaam hufan oo leh Hiigsi hagaagsan.

Sheekh Cali Wajiis oo ka mid ah Culimada Soomaaliyeed waxa uu tilmaamay inay muhiim tahay dadka inay dowladda ku taageeraan bixinta canshuuraha si dalku u gaaro isku filnaan.

Si loo dardar geliyo howlaha Horyaala Wasaaradda Maaliyadda ayaa Guddoomiyaha Gudigga Maaliyada ee Golaha Shacbka Soomaaliya Cali Cabdi Cismaan  waxa uu tilmaamay inay diiradda saarayaan sameynta sharciyada kaabaya.

Wasiirka Warfaafinta Dhaqanka iyo Dalxiiska ee Soomaaliya Eng Cabdiraxmaan Cumar Cismaan Yariisoow iyo wasiirka Dhallinyarada iyo cayaaraha Marwo Qadiijo Maxamed Diire ayaa Bogaadiyay waxqabadka  Wasaaradda Maaliyadda.

Wasiirka Maaliyadda ee Soomaaliya Dr  Cabdiraxmaan Ducaale Bayle ayaa u mahadceliyay dhamaan dadkii fududeeyay wixii u qabsoomay Wasaaradda sanadkii tegay, ayna qorsheynayaan in sanadkan ay sii labo jibaaraan howlaha horyaalla.

Ra’isul Wasaaraha Xukuumadda Federaalka ah ee Soomaaliya Mudane Xasan Cali Kheyre  oo soo xiray xafladda ayaa sheegay in kor u qaadida dhaqaalaha dalka uu yahay albaabka guusha si loo gaarana loo baahan in la taageero Wasaaradda Maaliyadda.

Ra’isul wasaare Kheyre waxa uu dul istaagay ahmiyada ilaalinta Hantida Qaranka oo ah amaano iyo la dagaallanka Musuq maasuqa  oo uu tilmaamay in bulshada looga baahan yahay inay doorkooda ka qaatan.

27 kadib ayay Dowladda Soomaaliya  ku guuleysatay inay si joogta ah u bixiso mushaaraadka shaqaalaha iyo daqligi loo qoondeeyay Hey’addaha Dowladda, waxaana sare u kacay daqligii gudaha, Beesha caalamka ayaa kalsooni u muujisay dowladda halka Hey’adda lacagta Aduunkana ay Soomaaliya u muujisay rajo ah in lagu cafiyo deymaha lagu leeyahay, waxaana gun dhig u ah howlaha isla xisaabtanka Hey’adaha Qaranka.

Did you like this? Share it:

LEAVE A REPLY

Please enter your comment!
Please enter your name here