Hay’adda Shaqalaha rayidka ah ee Puntland oo imtixaano qaaday

Hay’ada shaqalaha rayidka ah ee Dowlad goboleedka Puntland (Puntland Civil Service  Commission) oo qaadday imtixaankii Madax-qaybeedyada Shaqada iyo shaqaalaha  ee Hay’adaha iyo Wasaaradaha ka faa’iidaysanaya mashruuca tayaynta iyo  shaqo qorista ee uu Bangiga Aduunku maal-galinayo.

Dadka laga qaaday imtixaanka ee u tartamaya shaqooyinka bannaan ayaa ah dad  u badan dhalinyaro aqoonyahanno ah oo wax ku bartay jaamacadaha dalka iyo  dibadda, waxaana lagu kala xulayaa aqoonta  ay soo barteen iyo  waayo-aragnimadooda la xiriirta shaqada.

Munaasabadii lagu daahfuray imtixaanka laga qaadayey dadkii shaqooyinka soo  codsaday ayaa waxa goob joog ka ahaa laamaha kala duwan ee Dowlad goboleedka  Puntland ay u xilsaartay imtixaan qaadista.

Guddoomiyaha hay’ada shaqaalaha rayidka ah ee Puntland Mudane Mustafe  Siciid Shabac oo daah furay imtixaanka ayaa sheegay in shaqooyinka  ka  bannaan Dowladda ee tartanka loogu jiro ay yihiin 9 boos, kuwaas oo uu  sheegay inay imtixaam u galayaan 54 qof, waxaana dumar ahaa 22 qof, halka  ragguna uu ahaa 22 qof.

Guddoomiyaha ayaa sidoo kale sheegay in shaqooyinkan ay hore ugu soo  bandhigeen bulshada Puntland, si dadweynuhu ay ugu wada faa’iidaystaan,  Waxa uu intaasi raaciyey in  tartanka caynkan ah uu la mid yahay tartamada  aqoonta ku dhisan.

Imtixaankani wuxuu qayb ka yahay balanqaadkii Madaxweynaha Puntland Dr. Cabdiweli Maxamed Cali Gaas ee ahaa in shaqooyinka dawladdu soo  dhejiso ay dadku u sinnaan doonaan loona gelidoono imtixaam furan oo u
dhaca si hufnaan iyo caddaalad ah.

Ugu dambayntii tartamayaashii ayaa loo qaybiyeey waraqadihii imtixaanka  waxaana si dhow u ilaalinayey imtixaanka dad si gaar ah loogu soo xulay.

LEAVE A REPLY

Please enter your comment!
Please enter your name here