Hey’adda Socdaalka oo Gobolada dalka ka bilowday tababar ku saabsan hannaanka siyaasadda shaqada iyo shaqaalaha “SAWIRRO”

Agaasimaha Waaxda Shaqaalaha ee Hay’adda Socdaalka Mudane Siciid Axmed Xuseen, ayaa sheegay in tababarkan oo ay la kaashadeen Hey’adda Socdaalka Adduunka ee IOM , la qorsheeyay in loo qabto dhamaan Shaqaalaha iyo madaxda laamaha ay Hay’addu ku kala leedahay Gobollada Dalka , isla markaana uu yahay tababar muhiimad weyn u leh horumarinta nidaamka shaqaalaha hay’adda, kuna saabsan siyaaasadda shaqada ee hay’adda u degsan.

Agaasime Siciid, Mar uu ka hadlayay waxyaabaha sida gaarka ah loogu tababarayey shaqaalaha waxa uu sheegay, in Waaxda Shaqaaluhu ay ku tababareysay shaqaalaha iyo Madaxda laamaha ee Gobollada dalka, qodobada kala ah, Nidaamka fasaxyada, Habka Qiimeynta Shaqaalaha iyo Ilaalinta anshaxa , si loo dardargeliyo hannaanka lagu horumarinayo howlaha hortabinta u leh Hey’adda.

Agaasimaha Waaxda Shaqaalaha ee Hay’adda Socdaalka iyo Jinsiyadda Mudane Siciid Axmed Xuseen ayaa ugu dambeyn xusay in Tababarkan uu waxbadan ka tari doono horumarinta yoolka ay higsaneyso Waaxda shaqaalahu, maadaama uu xog-wareysi la yeeeshay dhamaan shaqaalaha ka hawlgala laamaha Gobolada dalka, si ay u ogaadaan fahamka guud ee ay ka qabaan hannaanka siyaasadda shaqada iyo shaqaalaha ee hay’adda Socdaalka iyo Jinsiyadda (HSJ) u degsan.

Tababarkan oo 11-July, 2021, ka soo bilowday magaalada Dhuusamareeb , laguna soo kala qabtay magaalooyinka Garoowe, Kismaayo iyo Jowhar ayaa la filayaa in 10-ka August, 2021-ka lagu soo gebagabeeyo magaalada Beydhabo ee xarunta Gobolka Baay.