Howlgallo laga sameeyay degmada Afgooye oo lagu soo qabtay tiro dad ah

Howlgaladan ciidanka amniga ay ka sameyeen degmada Afgooye iyo nawaaxigeeda ayaa waxa ay ku soo qabteen dad lagu tuhmayo inay ka tirsanyihin maleeshiyada Al-Shabaab, kuwaasi oo ay ku socoto su’aallo weydiin la xiriira waxyaabaha lagu tuhmayo.

Gudoomiye ku-xigeenka amniga ee gobolka Shabeelaha Hoose Cali Nuur Siyaad oo la hadlay Radio Muqdisho ayaa sheegay in howlgallo ay ciidamada uu ka dambeeya qarax shalay ka dhacay Afgooye, waxaana uu intaa ku daray in ciidanku ay ku soo qab qabteen tiro dad ah oo lala xiriirinayo inay ku luglahaayeen qaraxa, kuwaasi oo uu sheegay inay ku socoto baaritaanno dheeraad ah.

“Tiro dad ah ayaa howgalka lagu soo qabtay, su’aallo ayaa la weydiinayaa, marka lakala saaro, inta shacabka ah waan iska fasaxi doonaa, inta kale ee ku cadaata falalka lagu tuhmayo maxkamada ayaa lala tiigsan doonaan” ayuu yiri Cali Nuur.

Guddoomiye ku-xigeenka aya tilmaamay qaraxa uu ku dhintay qof shacab ah oo jidka hareerahee fadhiyay, isagoo intaa ku daray in qaraxa lala beegsaday gaari ciidanka AMISOM ah oo aysan jirin cid kale oo wax ka noqotay, ciidankuna ay ku guuleysteen inay furaan bam kale oo shacabka lagu dhibaateyn lahaa.

“Hal qof ayaa ku dhintay, mana jirin cidkale oo wax ku noqotay, ciidanku waxa ay sidoo kale fur fureen miino kale oo hareeraha waddada la geliyay oo la doonaya in dad rayid ah lagu waxyeeleeyo” ayuu hadalkiisa ku daray Guddoomiye ku-xigeenka amniga.

Maamulka Gobolka Shabeelaha Hoose ayaa dadaal ugu jira sidii ay uga hortagi lahaayeen dhibaatooyinka Shabaab ay ku hayaan shacabka halkaasi ku nool.

 

 

 

LEAVE A REPLY

Please enter your comment!
Please enter your name here