Howlgallo lagu dilay horjoogayaal iyo maleeshiyaad Al-Shabaab ah oo ka dhacay Jubbada Hoose& Hiiraan

Howlgal ay sameeyeen ciidanka Xoogga Dalka Soomaaliyeed iyo kuwa daraawiishta Jubbaland oo is garabsanaya ayaa lagu khaarijiyay maleeshiyaad ka tirsan Argagixisada Al-shabaab,kaasi oo ka dhacay gobolka Jubada Hoose.

Ilaa 15 xubnood oo ka tirsan Maleeshiyada Al-Shabaab ayaa lagu dilay howlgalkaasi oo ka dhacay deegaanka Bandar-jadiid oo u dhow Buundada Araare ee gobolkaasi Jubbada Hoose,islamarkaana waxa ay nolosha ku qabteen mid ka mid ah maleeshiyaadkaasi,sida uu warbaahinta Qaranka uu u xaqiijiyay taliyaha Ciidanka Xoogga Dalka Soomaaliyeed Janaraal Odawaa Yuusuf Raage.

Sidoo kale Taliyaha ciidanka Xoogga Dalka ayaa xaqiijiyay in Ciidanka Xoogga dalka hawlgal ay ka fuliyeen inta u dhaxaysa Jalalaqsi iyo Buuleburte lagu dilay Ibraahim Cabdi Turceey oo ahaa madixii Jabhadaha Al-shabaab ee gobolka Hiiraan iyo Xasan Yare oo ahaa madixii Miinooyinka.

Tani waxa ay muujinaysa in uu sii xoogaysanayo howlgalka ka dhanka ah argagixisada Al-shabaab,kuwaasi oo muddooyinkii ugu dambeeyey awoodoodi ay sii wiiqmaysay.

LEAVE A REPLY

Please enter your comment!
Please enter your name here