IFJ oo sheegay in ay halis ku jiraan  Saxafiyiinta  ku sugan Afgaanistaan

Xiriirka Caalamiga ah ee Saxafiyiinta ayaa sheegay in xaalad argagax iyo cabsi leh ay ku jiraan Saxafiyiinta ka howl gala Afgaanistaan, gaar ahaan haweenka, iyaga oo intaa ku daray inay ay soo gareen boqolaal codsi oo ka yimid Wariyaasha ka shaqeeya gudaha Afgaanistaan ​​ka dib markii kooxda Daalibaan ay la waregeen Kabul.

Ururka ayaa bayaan uu maanta soo saaray ku sheegay inay heleen boqolaal fariimood oo  looga codsanaaya caawinaad si ay ugu badbadaan waxyeeladda Maleeshiyaadka Daalibaan.

” Guud ahaan Haweenka suxufiyiinta  ah waxaa laga joojiyay inay ka shaqeyaan warbaahinta kala duwan, Saxafiyiinta ugu badan ee ka cararaya Daalibaan  waa Haween,” ayaa lagu yiri war-saxaafadeedkan ka soo baxay IFJ.

Dhanka kale Guddiga Ilaalinta Suxufiyiinta ee fadhigiisu yahay New York, ayaa sheegay in Kooxda Daalibaan ay toddobaadkan baartay Guryaha Afar kamid ah Saxafiinta ka shaqeeya Kabul, halka ay u hanjabeen qaar kamid ah shaqaale warbaahineed.

Bayaankan ayaa soo baxay kaddib  tacaddiyo loogeeystay suxufiyiin dhowr ah, kuwaa  oo tabinaayay bannaanbaxyo ka dhacay qeybo kamid ah Gobolka Nangarhar ee dhaca bariga Afgaanistaan Todobaadkii hore.