Iiraan iyo Shiinaha  oo isku afgartay saxiixa heshiis istiraatiiji ah

Waddamada Iiraan iyo Shiinaha ayaa maanta oo Sabti ah kala saxiixan doona heshiis iskaashi oo istiraatiiji ah kaas oo socon doona 25 sano, sida uu sheegay af-hayeen u hadlay Wasaaradda Arrimaha Dibadda Iiraan, oo lagu magacaabo Siciid Khadiib Zadeh.

Siciid Khadiib ayaa ku sheegay wareysi uu siiyay telefishanka dowladda in qoraal iskaashiga oo wada jir ah  la saxiixi doono maanta, inta lagu guda jiro booqashada Wasiirka Arrimaha Dibadda Shiinaha Wang Yi, kaasi oo  Jimcahii  gaaray Dehraan.

Afhayeenka  ayaa xusay in heshiiska uu diiradda saarayo dhinacyada dhaqaalaha, siyaasada iyo ka qeybgalka Iiraan ee mashruuca Belt, kaasi oo ah qorshe weyn oo Shiinaha uu ku dhisaayo mashaariicda kaabayaasha dhaqaalahiis si kor loogu qaado xiriirka ganacsi ee Beijing ay ka damacsantahay in ay la yeelato Qaaradaha Aasiya, Yurub iyo Afrika.

Heshiiska ayaa waxaa maanta lagu saxiixi doonaa dhismaha Wasaaradda Arrimaha Dibadda ee Iiraan kaasoo ay si wada jir ah u saxiixi doonaan Wasiirka Arrimaha Dibadda Iiraan Maxamed Jawaad Dariif iyo dhigiisa Shiinaha Wang Yi.