Israel oo Gaza ku dishay afar Falastiiniyiin ah

1449

Ciidanka Israel ayaa jimcihii shalay diley afar Falastiiniyiin ah ka dib markii weeraro kala gooni gooni ah ay ku qaadeen aaga militirigu ka caagan yahay ee ku dhow magaalada Gaza, sida ay sheegtay wasaaradda caafimaadka magaaladaas.

 

Weerarka  hore ayaa ka dhacay deegaanada Khan Younis iyo Rafah ee koofurta Gaza, halkaas oo taagiyada iyo dayaaradaha dagaalka ee  Israel ay beegsadeen xarumo ciidan oo ay leeyihiin Ezzedine al-Qassam, oo ah garabka hubeysan ee dhaq dhaqaaqa Xamaas, waxaana laga diley sadex kamid ah xubnahooda.

“Sadex kamid ah Falastiniyiinta ayaa ku shahiiday gacanta ciidanka gumeysiga Israel, labo weerar waxaa ay ka dhaceen waqooyiga Gaza, halka sadex kale lagu qaaday koofurta magaalada Rafax,”  sidaa waxaa war qoraal ah ku sheegay afhayeenka wasaaradda caafimaadka maamulka Gaza ee Ashraf al-Qidra.

Hase yeeshee, afhayeenku ma sheegin magacyada iyo macluumaad kale oo ku saabsan dadka la diley.

Si kastaba, Guutada  al-Qassam ayaa sii deysay magacyada raga laga diley waxayna kala yihiin; Shaaban Abu Khater, 26, Mohamed Abu Farhana, 31, iyo Mahmoud Qeshta, 23 jir ah.

Sidoo kale, dhacdo labaad ayaa la soo wariyay in ay ka dhacday goobta loogu magac daray kala wareega banaan baxyada (return marches) halkaas oo lagu toogtay hal nin waxaana lagu dhaawacay 120 kale markii ciidanka Yuhuuda rasaas iyo gaaska dadka ka ilmeysiiya lagu furey dibad baxyaasha.

Wasaaradda caafimaadka Falastiin ayaa ninka la diley magaciis ku sheegtay Mohamed Sherif Badwan, oo 27 jir ahaa, kaas oo ciidanka Israel ay rasaas kaga dhufteen xabadka, bariga magaalada Gaza.

Ku dhowaad afar bilood, Falastiiniyiintu waxaa ay magaalada Gaza ka wadaan dibad baxyo dhanka ah Israel, kuwaas oo u soo dhowaanayay deegaanka ay ciidanku ka caagan yihiin ee dhaca xuduuda labaa dhinac.

Tan iyo markii dibad baxyada bilowdeen 30 Maarso ee sanadkan, in ka badan 140 Falastiiniyiin ah ayaa la diley, halka kumanaan kale dhaawacyo soo gaareen.

Dibad baxyaasha, ayaa dalbanaya in loo ogolaado in ay ku laabtaan deegaanadooda oo ay dhaxal u leeyihiin laga soo bilaabo 1948 markaas oo si xoog ah looga barakiciyay isla markaana lagu abuurey maamulka Israel.

Sidoo kale, waxaa ay doonayaan in ay cunaqabateynta 11 sano jirsatay laga qaado magaalada Gaza oo ay qiyaastii ku nool yihiin labo milyan, kuwaas oo dhibaato bani’aadanimo ku heysato magaaladaas.

Did you like this? Share it:

LEAVE A REPLY

Please enter your comment!
Please enter your name here