Kenya oo sheegtay in ay dishay 19 ka tirsanaa maleeshiyaadka Al-shabaab

Wasaaradda gaashaandhigga dalka Kenya ayaa sheegtay in ciidankooda qeybta ka ah howlgalka midowga Afrika ee Soomaaliya AMISOM ay dileen 19 ka tirsan maleeshiyaadka kooxda nabad diidka ah ee Alshabaab ka dib dagaal ka dhacay degmada Af-madow ee gobolka Jubada hoose.

Dagaalka maleeshiyaadka Al-shabaab lagu diley ayaa sidoo kale ciidanka AMISOM waxaa qeyb ka ahaa ciidanka xooga dalka Soomaaliya ee ka howlgala deegaanada Jubaland.

Afhayeen u hadlay ciidanka dalka Keyna oo lagu magacaabo David Obonyo,ayaa sheegay in maleeshiyaadka ay isku dayeen in ay u soo dhowaadaan saldhiga ciidanka Soomaaliya ay ku lahaayeen degmada Af-madow isla markaana iska hor imaadka uu halkaasi ka bilowday iyadoo ciidanka AMISOM oo saldhig kale ku lahaa goob ka ag dhow ay u soo gurmadeen abaare kowdii habeenimo ama todobo saac.

“Kooxda Alshabaab ayaa isku dayay in ay weerar ku soo qaadaan saldhig isla markiiba waxaa ka hortagay ciidanka dalka Kenya ciidanka hadda rondo ayay ku jiraan,” ayuu hadalkiisa ku daray.

Obonyo ayaa tilmaamay in 19 laga diley kooxda Al-shabaab sidoo kale laga burburiyay hal gaari lagana furtay 10 qori oo AK-47 iyo sadex gentaalada garabka laga rido ee loo yaqaano RPG.

 

LEAVE A REPLY

Please enter your comment!
Please enter your name here