Kooxo hubeysan oo dhaawac u geystay mudane ka tirsan baarlamaanka

1262

Kooxo hubeysan ayaa dhaawacay mudane ka tirsan baarlamaanka Federaalka ee Soomaaliya oo lagu magacaabo Maxamed Cali Diheeye, iyadoo falkaasi ay ku geeriyoodeen labo ka tirsan ilaaladiisa sida ay qortay Wakaaladda Wararka Qaranka Soomaaliyeed ee SONNA.

Warka ayaa intaa ku daraya in kooxaha dhaawaca u geystay Xildhibaanka ay goobta ka baxsadeen, iyadoo falkaasi uu ka dhacay nawaaxiga Bacadlaha ee degmada Xamarweyne.

Dhanka kale, Afhayeenka gobolka Banaadir, Cabdifitaax Cumar Xalane oo ka hadalay dhacdadaan ayaa Wakaaladda SONNA u xaqiijiyay in dableey hubeysan ay rasaas ku fureen gaari uu saarnaa Xildhibaanka xilli uu marayay nawaaxiga Bacadlaha, waxaana halkaasi ku geeriyooday labo ka mid ah ilaalada Xildhibaanka, iyadoo sidoo kale dhaawacyo kala duwan ay soo gaareen xildhibaanka iyo dadweyne kale oo ka agdhawaa goobta ay dhacda ka dhacday.

“Weerarka waxaa ku dhaawacmay xildhibaanka, waxaana sidoo kale ku geeriyooday labo ka mid ah ilaaladiisa” ayuu yiri, Afhayeenka gobolka Banaadir, C/fitaax Cumar Xalane.

Dhaawaca xildhibaanka ayaa haatan waxaa lagu dabiibayaa mid ka mid ah xarumaha caafimaadka ee ku yaala Magaalada Muqdisho.

 

 

Did you like this? Share it:

LEAVE A REPLY

Please enter your comment!
Please enter your name here