Kulan looga hadlayay xoojinta amniga oo lagu qabtay Gaalkacyo “SAWIRRO”

Kulanka oo ahaa mid intiisa badan looga hadlayay xoojinta iyo wada shaqeynta ciidamada booliiska Federaalka ee ku sugan deegaannada dowlad gobaleedyada Puntland iyo Galmudug ayaa waxaa maanta magaalada Gaalkacyo kuwada yeeshay qaar ka mida saraakiisha sar sare ee Ciidamada Booliiska dowlad gobaleedyada Galmudug iyo Puntland.

 

Kulanka oo qaatay muddo saacada ah ayaa looga hadlay wada shaqeynta Ciidamada Booliiska Federaalka Soomaaliyeed ee ka howl gala deegaanada Galmudug iyo Puntland.

Shirka ayaa markii uu soo idlaaday waxaa warbaahinta Qaranka si wadajir ah ugu horeyn ula hadlay Gaashaanle Sare Yuusuf Axmed Ciise Taliyaha Saldhiga dhexe Bari ee Boosaaso iyo Taliye ku xigeenka Ciidamada booliiska Federaalka ee Galmudug Gaashaanle Sare Cabdi Jaamac Cabdulle Xabeeb oo sheegay in kulan diiradda lagu saaray ahmiyada ay u leedahay amniga iyo Nabad galyada, haddii la helo wadashaqeyn dhameystiran oo u dhaxeeysa  ciidamada booliska  ee ka howlgala Galmudug iyo Puntland, iyagoo dhanka kalana xusay in ay jirtay wada shaqeyn ka dhaxeeysay isla markaana keentay in dhowr jeer oo hore ciidamada booliiska ay qabteen dad falal danbiyeedyo ka soo galay deegaano kale oo lagu guuleystay in gacanta lagu dhigo.

Jenaraal Cabdicasiis Yuusuf Aadan (Dhaga badan) Taliayaha Ciidamada Booliiska Galmudug ayaa isna sheegay in mar kasta ay kulama joogtaa yeelan doonaan saraakiisha ciidamada Booliiska labada Dowlad Gobaleed ee Puntland iyo Galmudug, waxaana uu xusay in bishiiba mar kulan ay isugu imaan doonaan saraakiisha ciidanka Booliiska si loo dar dargeliyo wada shaqeynta labada dhinac.

Inkastoo ay tahay markii u horeeysay oo kulan ceynkaan oo kala ah ay isugu yimaadaan saraakiisha ciidamada Booliska Federaalka ee ka howlgala deegaanada Dowlad Gobaleedyada Galmudug iyo Puntland ayaa haddana waxaa kulankaan uu kusoo beegmayaa xilli mudooyinkii u danbeeyay ay jireen dadaalo la xariira dhanka iskaashiga amniga iyo Nabad galyada oo u dhaxeeya dowlad gobaleedyada Galmudug iyo Puntland.

W/Q: Wariye C/risaaq Maxamed Axmed (C/risaaq Galkacyo)