Kulan sinnaan la’aanta looga hadlayay oo Mareykanka lagu qabtay-Sawirro

0
2661

 

Kulankan oo ay soo abaabuleen ururka Somali Siman oo ah urur u ololeeya arimaha bulshada ayaa ka dhacay gobolka Virginia ee dalka Mareykanka, waxaa ka soo qeybglay qeybaha bulshada, siyaasiyiin, iyo safiirka dowlada Soomaaliya u fadhiya Mareykanka Axmed Ciise Cawad.

Arimaha  kulankan diirada lagu saaray ayaa aheyd in dadka Soomaaliyeed laga wacyi galiyo sidii bulshada looga ciribtiri lahaa arimaha kala qabiileysiga, Quursiga iyo liidida oo qeybo ka mid ah bulshada Soomaaliyeed lagu hayo.

Dr.Rashiid oo ka mid ahaa xubnihii ka hadlay meesha ayaa ka sheekeeyay marxalada ay ku suganyihiin dad badan oo Soomaali ah oo ku nool gudaha Soomaaliya, kuwaas oo aaminsan in ay ka liitaan dadka kale taas oo sababtay in ay gaari waayeen yoolka noloshooda, isla markaana aysan si furan u dhexgali karin bulshada inteeda kale, sida Guurka, Siyaasada, dhaqanka, iyo fursadaha kale oo aan badanaa loo ogoleyn.

Safiirka dowlada Soomaaliya u jooga magaalada Washington ee dalka Mareykanka, Axmed Ciise Cawad oo ka soo qeybgalay kulankan ayaa dhankiisa ku dheeraaday sida arimahan ay ku badan yihiin caalamka laakin ay kala halis badan yihiin, iyada oo Soomaaliya ay ka jirto wacyigalin la’aan la xariirta arimaha faquuqa salka ku haya.

Waxa uu intaa ku daray in dadka Soomaaliyeed aysan kala duwanayn kalana sareeyn karin isaga oo ugu baaqay bulshada in dadka walaalahooda ah ay u arkaan in iyaga oo kale ay yihiin oo aan marnaba la ilaabin in Soomaalidu isku af, dhaqan iyo midab tahay.

Proff. Cabdi M.Kusoow oo ah aas aasaha ururka Somali Siman ayaa aad ugu hadlay halka ay hiigsanayaan iyo waxa Somali siman u taagan yihiin, isaga oo ka digay cawaaqib xumada ka dhalan karto hadii faquuqan uu bulshada ku dhex jiro.

Kusoow, ayaa ayaa xalka arintan u arka in bulshada Soomaaliyeed wacyigooda kor loo qaado isla markaana waxbarashada lagu dadaalo, isagoo tilmaamay in nabad iyo horumar la gaaraa ay ku xiran tahay in bulshada Soomaaliyeed is ogolaato.

Dr.Abukar Carmaan oo ah aqoonyahan siyaasi ah oo kulanka la qeybgalay ayaa waxaa uu sheegay in arintan sabab u tahay jahliga ka dhex jira bulshada Soomaaliyeed loona baahan yahay in arintaas xal loo helo, waxaana dowladda Soomaaliya iyo maamulada kale ee dalka ka jira ka codsaday in ay hoos u fiiriyaan arimahan.

IMG_9160 IMG_9167 IMG_9207 IMG_9211 IMG_9212 IMG_9220 IMG_9270 IMG_9272 IMG_9275 IMG_9287 IMG_9351 IMG_9364 IMG_9428 IMG_9437 rgr tyr676

Deeqo Shire (SONNA)

 

Did you like this? Share it:

LEAVE A REPLY

Please enter your comment!
Please enter your name here