Kulanka Baarlamaanka oo su’aalo lagu weydiiyay wasiirka Maalliyadda

0
1315

Su’aallaha la weeydiiyey Wasiirka Maalliyadda dowladda Federaalka Soomaaliya ayaa kala ahaa Mushaaraadka Ciidammada,shaqaallaha rayidka ee dowladda,lacago la sheegay in seddexdii billood ee lasoo dhaafay aan la ogeyn halka lagu bixiyey,canshuur dhaafka badeecooyinka shakhsiga oo kordhay bilihii lasoo dhaafay,habraaca kharash bixinta dowladda oo mudnaanta siinaya raashiinka Ciidammada, gunnada Ciidammada iyo shaqaallaha rayidka ah ee dowladda iyo amar la sheegay in uu kasoo baxay Hanti dhowrka guud ee Qaranka.

Biya dhaca su’aallaha Xildhibaannada Baarlamaanka waxa ay aheyd jah wareerka dhaqaalle ee uu dalka ku jiro Lixdii billood ee lasoo dhaafay oo ah inta Wasiirku hayo xilka Wasaaradda Maalliyadda.

Wasiirka Wasaaradda Maalliyadda Mudane Maxamed Aadan “Fargeeti” uu Xildhibaannada Baarlamaanka uga jawaabay su’aallihii ay weydiiyeen ayaa faah faahiyey qaabka loo maareeyey lacag gaareysa $ 49,173,77 oo ah dakhliga dowladda soo galay seddexdii bilood ee lasoo dhaafay,si gaar ah  waxa uu jawaab uga bixiyey daaha bixinta musharaadka shaqaallaha rayidka ah ee dowladda iyo Ciidammada.

Guddoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad oo shirka guddoominayey ayaa xeritaankii kulanka sheegay in kulanka soo socda ay Mudaneyaasha Baarlamaanku dood furan ka yeelan doonaan jah wareerka dhaqaalle ee dalka ka jira waxaana uu ka dalbaday guddiga Maalliyadda ee Baarlamaanka iney faah faahinnada ay hayaan la wadaagaan Xildhibaannada.

Sida uu qabo Xeer Hoosaadka Golaha Shacabka hadii Mas’uul la weydiinayo su’aal oraaheed waxa ay socon kartaa 90 daqiiqo oo ah hal saac iyo bar balse Wasiirka Maalliyadda kulanka su’aallaha lagu weeydiinayey waxa uu socday 250 daqiiqo,29 Xildhibaan ayaa su’aallo weydiiyey,wadarta su’aallaha la weeydiiyey Wasiirkana waa 68 su’aal, tallaabadanna waxey muujineysaa sida Baarlamaanku ay muhiimad siinayaan xiligan xaaladda dhaqaalle ee dalka uu ku jiro waloow ay dad badani aaminsan yihiin iney tahay tallaab mar hore loo baahnaa.

Did you like this? Share it:

LEAVE A REPLY

Please enter your comment!
Please enter your name here