Wednesday, January 20, 2021
Home Blog

Xubno ka tirsan argagaxisada Al-shabaab oo lagu dilay duqeyn ka dhacday nawaaxiga Jamaame

Dowladda Federaalka ee Soomaaliya, oo kaashaneysa

Taliska Mareykanka ee Afrika (AFRICOM), ayaa labo weerar oo dhanka cirka ah ku qaaday xubno ka tirsan kooxda argagaxisada shabaab oo ku sugnaa nawaaxiga Dab shiniile iyo Jamaame

Duqeynta oo dhacday 19 Janaayo ayaa waxaa lagu dilay sadax xubnood oo argagaxisada ka tirsanaa

Xubnaha weerarka lagu dilay ayaa ahaa saraakiil argagaxisada u qaabilsanaa fududeynta miinooyinka macmalka ah iyo qorista maleeshiyaadka,

Ma jiro wax qasaare ah oo gaaray dadka rayidka ah .

Ciidamada Dowladda Federaalka ee Soomaaliya iyo Taliska Mareykanka ee Afrika ayaa qaada tallaabooyin looga hortagayo waxyeelada soo gaarta dadka rayidka ah

Kulan lagu taageerayay dowladda, laguna soo dhaweynayay Wasiiru dowlaha Isboortiga oo lagu qabtay Muqdisho “SAWIRRO”

Kulankan lagu soo dhaweynayay Wasiiru dowlaha Wasaaradda Dhallinyarada iyo Cayaaraha ee Xukuumadda Federaalka Soomaaliya, isla markaana lagu taageerayay dowladda Federaalka Soomaaliya ayaa waxaa ka qeybgalay odayaasha dhaqanka, qeybaha kala duwan ee Bulshada, aqoonyahanno iyo mas’uuliyiin ka tirsan Dowladda oo madasha lagu casuumay.

Qaar ka mid ah odoyaasha dhaqanka ee kulanka ka hadlay ayaa dowladda uga mahadceliyay dadaalada ay ugu jirto sidii dalka loo gaarsiin lahaa horumar iyo barwaaqo.

Nabadoon Maxamed Daahir Macalin Xasan iyo Xildhibaan Cabdullaahi Maxamed Cumar ayaa tilmaamay in dowladdu ay ku guuleysatay horumarka uu dalku gaaray, ayna diyaar u yihin inay garab istaagaan dowladnimada Soomaaliya.

Malaaq Cali Malaaq Maxmed Malaaq Wehliye ayaa tilmaamay in Ra’isul Wasaaraha dalku uu yahay shaqsi doonaya in wax walba lagu dhameeyo wanaaga, isagoo bulshada Soomaaliyeed ugu baaqay inay garab istaagaan dowladooda.

Wasiiru dowlaha Wasaaradda Dhallinyarada iyo Ciyaaraha ee Xukumadda Fedaraalka Soomaaliya mudane Maxamed Xaaji Ibraahim ayaa tilmaamay in dowladdu ay diyaar u tahay in dalku uu aado doorasho loodhanyahay, isagoo xusay in dowladnimada ay tahay wax la wada leeyahay, loona baahanyahay in la ilaashado.

“Dowladnimada waa sheey la wada leeyahay oo cid la arkaba ay qeyb ku leedahay, waxaan rabaa inaan idin xaqiijiyo in dowladnimada Soomaaliya aysan jirin cid aad marti uga tihiin, kuna dadaalla taageerada ay dowladda u heysaan” ayuu yiri Wasiiru dowlaha Wasaaradda Dhallinyarada iyo Cayaaraha.

Goob qashinka lagu keydiyo oo laga hirgeliyay duleedka magaalada Jowhar “SAWIRRO”

Maamulka Gobolka Shabeelaha Dhexe iyo kan Degmada Jowhar  ayaa bilaabay ololo nadaaafadeed oo ku saabsan bilic soo celinta caasimadda Hirshabeelle ka fuliyay magaalada Jowhar.

Maamulka degmada iyo kan gobalka ayaa sameeyay goob loogu talagalay in qashinka lagu  shubo.

Ugu horeyn Duqa magaalada Jowhar Saalax Muudeey Cali iyo Guddoomiyaha Degmada Jowhar Ismaan Maxamed Mukhtaar Baareey oo goobta ka hadlay ayaa bulshada ku nool caasimadda ugu baaqay in ay ka qayb qaataan ololaha isxilqaan ee lugu soo celinayo bilicdii ay lahayd magaalada Jowhar.

Guddoomiyaya Gobalka Shabeelaha Dhexe Axmed Meyre Makaraan ayaa ku baraarujiyay shacabka ku nool Jowhar iyo maamulka Magaalada in loo bahanyahay si wadajir ah looga qayb qaato nadaafadda, madaama Jowhar ay kulansatay Caasimadda Gobalka iyo Caasimadda dowlad Goboleedka Hirshabeelle, isagoo xusay in goob qashinka lagu keydiyo laga hirgeliyay duleedka magaalada Jowhar.

 

Guddoomiye Cumar Filish oo kormeeray dhismaha  waddada dheer ee isku xirta isgoysyada Afarta darjiino iyo Maanabolyo ”SAWIRRO”

Guddoomiyaha gobolka Banaadir ahna duqa magalada Muqdisho mudane Cumar Maxamuud Maxamed (Cumar Filish) ayaa maanta kormeeray dhismaha  waddada laamiga ah ee isku xirta isgoysyada afarta darjiino iyo Manabolyo, halkaas oo ay ka socoto dayactir xoogan.

Dhismaha waddadaan ayaa in mudaa socotay, iyadoo uu gaba-gabo ku dhowyahay dhismaheeda.

Dhismha waddadaan ayaa waxaa daba socda bulaacado laga dhisayo waddada dhinacyadeeda.

Maalmulka gobolka Banaadir ayaa ku guuleestay in ay dhisaan waddooyin badan oo ka tirsan gobolka Banaadir iyo dib u dayactir lagu sameeyay waddooyin badan oo bur-bursanaa.

Ciidanka kumaandooska Qaranka oo hoowlgal ka sameeyay deegaanka Shabeeloow “SAWIRRO”

Ciidamada kumaandooska Danab ururka 6 aad ee xoogga  dalka ayaa howlgal ballaaran ka sameeyay deegaanka Shabeeloow oo Qiyaastii 20km u  jirta deegaanka Bacaadweyne ee Gobolka Mudug

Iska hor imaad kooban ka dib maleeshiyadii argagaxisada  Al-shabaaab ayaa isaga cararay goobtii lagu dagaallamay, Dadka reer Bacaadweyne ayaa door muhiim ah ka qaatay jabka argagaxisada.

Saraakiisha Danab ayaa sheegay inay sii wadayaan dagaalka maleeshiyada lagula jiro.

Maalmihii la soo dhaafay Galmudug ayaa ciidamo badan geeysay koonfurta gobolka Mudug si looga hortago ururka Al-shabaab kuwaasoo dhibaato ku haya qaar ka mid shacabka ku nool deegaanno ka tirsan Gobolka Mudug.

Guddoomiye Cumar Filish oo xafiiskiisa ku qaabilay danjire ku xigeenka dalka Swedan”Sawirro”.

Guddoomiyaha gobolka Banaadir mudane Cumar Maxamuud Maxamed (Cumar Filiah) ayaa maanta xafiiskiisa ku qaabilay safiir ku xigeenka dowlad Swedan u fadhiya Soomaaliya Petra Smitmanis Dry.

Labada masuul ayaa kulankooda uga hadlay kaalinta ay dowlada Swedan ku leedahay dib-udhiska dalka, amniga, taageerida bulshada Soomaaliyeed taas oo qeyb weyn ka ah hormarka dalka  gaara ahaan gobolka Banaadir.

Guddomiyaha gobalka ayaa uga mahadceliayay danjire ku xigeenka Sweden tababbarada ay siiyaan shaqaalaha dowladda hoose ee Xamar  iyo sidii loo dardar galin lahaa Mataaneenta labada magaalo èe Muqdisho iyo Gothenburg.

Safiir ku xigeenka Safaaradda Swedan ee Soomaaliya ayaa ballan qaaday in ay kordhin doonaan taageerada ay siiyaan shacabka gobolka Banaadir, isagoo ku amaanay masuuliyiinta maamulka gobalka Banaadir howlaha ay u hayaan bulshada caasimadd.

Gabogabadii kullankaan ayaa kusoo idlaaday is af-garad iyo dhammaan qodobada la isla soo hadal qaaday.

 

 

Wasaaradda Gaadiidka iyo Duulista Hawada oo ka hadashay qorshayaasha iyo sharuucda marista wadooyinka.

Iyadoo magaalada caasimadda ah ee Muqdisho ay ku soo badanayaan gaadiidka noocyadiisa kala duwan ayaa Wasaaradda Gaadiidka iyo Duulista Hawada xukuumadda federaalka Soomaaliya waxa ay ka hadashay qorshayaasha wasaarada iyo howlaha sharuucda marista wadooyinka oo ay soo saartay wasaaradda kaasi oo la doonayo in lagu dhaqo gaadiidka noocyadiisa kala duwan ee ka howl gala dalka gaar ahaan caasimadda magaalada Muqdisho.

Wasaaradda gaadiidka iyo Duulista hawada dowladda Soomaaliya ayaa tilmaantay in ay jiraan dadaalo iyo horumaro ay ka sameysay sidii loo bari lahaa gaadiidleyda shuruucda iyo ku dhaqanka ilaalinta nidaamka marista wadooyinka ayna diyaarisay wasaaradda sharcigii wado marista.

Agaasimaha guud ee Wasaaradda Gaadiidka iyo Duulista hawada xukuumadda federaalka Soomaaliya Cali Gacal Gaabow ayaa ka warbixiyay horumarada waxqabadka wasaaradda qorshayaasha wasaaradda iyo diiwaan galinta gaadiidka waxaana uu sheegay in wasaaradda ay ku guuleysatay in ay diyaarisay sharuucda marista wadooyinka.

 

Madaxweynaha Dowlad Goboleedka Puntland oo kulamo ka wada Magaalada Qardho”Sawirro”

Madaxweynaha Dowlad Goboleedka Puntland Siciid Cabdullaahi Deni, oo safar shaqo ku jooga Magaalada Qardho ayaa qasriga Madaxtooyada ku qaabilay haweenka iyo Dhallinyarada Magaalada Qardho.

Kulanka ayaa waxaa looga hadlay xaalada guud ee Gobolka , gaar ahaan dhanka nabad galyada iyo horumada ka jiro magaalada Qardho iyo guud ahaan Gobolka.

Haweenka iyo Dhalinyaradda Magaalada Qardho ayaa Madaxweyne dani uga mahadceliyey dadaalada uu wado maamulka puntland dhanka kale Madaxweyne Deni ayaa dhankiisa waxaa uu ugu baaqay Haweenka iyo Dhalinyarada ku nool Magaalada Qardho inay si wanaagsan ula Shaqeeyaan Madaxda Maamulka Puntland.

Xukumada JFS oo beenisay in ciidanka soomaaliya ay qeyb ka yihiin dagaalka waqooyiga Itoobiya.

Xukuumadda ayaa si adag u beenisay warar been abuur ah oo laga fidiyey ciidamada Xoogga Dalka Soomaaliyeed ee tababarka u jooga waddamada dibadda.

Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cismaan Abuukar Dubbe ayaa sheegay in wararkaasi yihiin been abuur ay dadka qaar siyaasad ka raadinayaan.

Ma jiro ciidan soomaaliyeed oo Tigray ka dagaalamay iyo ciidan ay itoobiya dowlada soomaaliya weydiisatay ayuu yiri wasiirka warfaafinta.

Wasiir Dubbe wuxuu tilmaamay in dadka dacaayada noocaas oo kale ah faafinaya ay ka so horjeedaan oo ay diidan yihiin in soomaaliya ay yeelato ciidan xoog leh oo amaankeeda ay ku filnaato

Wasiir Dubbe “Dhismaha Jidka isku xira Muqdisho iyo Afgooye meel gabo gabo ah ayuu marayaa”

Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cismaan Abuukar Dubbe oo maanta kormeer howleed ku tegay jidka isku xira Afgooye iyo Muqdisho ee dhismaha ku socda ayaa tilmaamay in waddadan ay muhiim u tahay isu socodka gaadiidka iyo dadweynaha isaga kala goosha Gobolka Banaadir iyo gobollada kale ee dalka.

“Jidka isku xira Muqdisho iyo Afgooye ayaan maanta kormeer ku imid, si aan u ogaano shaqada sida ay u socoto, jidkan waxa uu ahaa markii hore, sadex mitir iyo sadex mitir oo labada dhinac ah, balse waxaa hadda la dhisay jid balaaran oo ah 28 mitir oo labada dhinac ah, waana kii koowaad oo laga sameeyo geyiga Soomaaliya.” Ayuu yiri Wasiir Dubbe oo hadalkiisa ku daray “Ku dhawaad 28 kiilo mitir ayaa la dhisay waddada, waxaana hadda joognaa meel Afgooye u jirta 2kiilo mitir”.

“Waxqabadku waa wax muuqda oo aad iyo aad u qurux badan, taasoo micnaheedu yahay in aan ka guuleysanay Cadawga hortaagnaa Horumarka dalka”. Ayuu yiri Wasiir Dubbe.

Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cismaan Abuukar Dubbe ayaa dowladda Qatar uga mahadceliyay lacagta ay ku bixisay dhismaha waddada isku xirta Muqdisho iyo Afgooye, isagoo sidoo kale uga mahadceliyay ciidamada Haram-cad oo kaalin weyn ka geystay sugidda amniga.

“Jidkani ma ahan jid mashruurc dhismo oo kaliya, waa halgan, waa dagaal, waa loolan ka dhexeeya Dowladnimada iyo kuwa dowladka diid ah, waxaan maqli jirnay xilligii todobaatanaadka hees tiraahda, Maba doonayaanee inaynu dowlad ahaano, 2021 ayay dad diidanyihiin inuu dalka dhismo oo dowlad noqdo, oo uu helo mashaariic u dhigma, mashaariicda hadda aynu maanta halkan u joogno”ayuu yiri Wasiir Cismaan Dubbe.

Wasiirka ayaa xusay in wejiga labaad ay noqon doonto dhismaha waddada isku xirta Muqdisho iyo Jowhar marka laga soo gabo gabeeyo jidka dhismaha jidka isku xira Muqdisho iyo Afgooye.